ស្តាប់អត្ថបទជាសំឡេង
ភ្នំពេញ៖ ឆ្នាំនេះរបបទឹកភ្លៀងដែលទទួលបាននៅតំបន់ការពារទេសភាពអន្លង់ព្រីង មានទំហំតូច បានបង្កជាក្ដីបារម្ភដល់សហគមន៍ផលិតស្រូវមិត្តក្រៀលនៅក្នុងភូមិកោះ និងភូមិច្រេះ ស្រុកកំពង់ត្រាច ខេត្តកំពត។
លោក ប៊ូ វរសក្ស នាយកអង្គការជីវិតធម្មជាតិនៅកម្ពុជា បានឱ្យពុទ្ធិញូវ ដឹងនៅរសៀលថ្ងៃទី២៨ ខែកញ្ញា ឆ្នាំ២០២១ថា គម្រោងនេះជាឆ្នាំដំបូងដែលមានប្រជាកសិករ៤១គ្រួសារ បានចុះកិច្ចព្រមព្រៀង ផលិតស្រូវមិត្តក្រៀល លើទំហំដីជាង៣៥ហិកតា។ ចំពោះស្ថានភាពទឹកនេះជាក្ដីបារម្ភ ព្រោះកសិករដាំស្រូវពឹងផ្អែកទាំងស្រុង ទៅលើរបបទឹកភ្លៀង ជាប្រភេទស្រូវពង្រោះតែរហូតមកដល់ថ្ងៃនេះ ស្រូវនោះមិនទាន់ខូចនៅឡើយទេ ខណៈដល់ពេលបាចជីទឹកពុំសូវមាននៅក្នុងស្រែនាំឱ្យពន្យារពេល “ប៉ុន្តែលទ្ធផលខូចខាតយ៉ាងណាមិនទាន់ដឹង មិនទាន់មាននៅឡើយទេ មិនទាន់ដល់ថ្នាក់គោកស្រូវ គ្រាន់ទឹកវាតិច យើងពិបាកបាចជីអលកានិច (ជីកំប៉ុស្ត) ដែលបានផ្ដល់ឱ្យកសិករ”។
សូមបញ្ជាក់ថា កសិករដែលចូលរួមដាំស្រូវមិត្តក្រៀលនេះ តាមការគ្រោងទុកនៅជំហានបន្តបន្ទាប់នឹងទទួលបាន ការបណ្តុះបណ្តាលបច្ចេកទេស កសិកម្មតាមផែនការដែលបានកំណត់ ដើម្បីឈានទៅកាត់បន្ថយការប្រើប្រាស់ថ្នាំគីមី និងផ្តល់សុវត្ថិភាពដល់សត្វក្រៀល និងជីវចម្រុះផ្សេងទៀត។ រីឯស្រូវពូជ និងជីសរីរាង្គកសិករក៏នឹងទទួលបានផងដែរ ពីគម្រោងសហគមន៍ស្រូវមិត្តក្រៀលសហការអនុវត្តដោយ អង្គការជីវិតធម្មជាតិនៅកម្ពុជា ក្រសួងបរិស្ថាន អង្គការBirdLife និងអង្គការCRDT៕
អត្ថបទ និងរូបភាពដោយ៖ Puthinews
