នាយករដ្ឋមន្ត្រីអ៉ីស្រាអែល លោក ណាហ្វតាលី ប៊េននែត (Naftali Bennett) នៅថ្ងៃព្រហស្បតិ៍សប្ដាហ៍នេះបានឱ្យដឹងថាលោក ប្រធានាធិបតីរុស្ស៉ី វ្ល៉ាឌីមៀ ពូទីន បានសូមទោសហើយជុំវិញការលើកឡើងពីសំណាក់រដ្ឋមន្ត្រីការបរទេសរបស់លោកដែលថាលោក អាដុលហ្វ៍ ហ៊ីត្លែ មានដើមកំណើតជាជនជាតិជ្វីហ្វ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី០៦ ខែឧសភា ឆ្នាំ២០២២។
លោក Naftali Bennett ធ្វើការកត់សម្គាល់ខាងលើ បន្ទាប់ពីបានជួបពិភាក្សាតាមទូរស័ព្ទជាមួយលោក ពូទីន ហើយលោកផ្ទាល់ក៏បានអះអាងដែរថា លោកប្រធានាធិបតីរុស្ស៉ីប្រាប់រូបលោកថារុស្ស៉ីនឹងអនុញ្ញាតឱ្យជនស៊ីវិលចាកចេញពីរោងកច្រស្លដែក Azovstal ក្នុងទីក្រុង Mariupol តាមច្រករបៀង មនុស្សធម៌ក្រោមកិច្ចសម្របសម្រួលដោយអង្គការសហប្រជាជាតិ និងកាកបាទក្រហមអន្តរជាតិ។ បើតាមការិយាល័យនាយករដ្ឋមន្ត្រីអ៉ីស្រាអែល លោក Bennett បានស្នើសុំទៅកាន់លោក ពូទីន ឱ្យជនស៊ីវិលចេញពីរោងចក្រ Azovstal បន្ទាប់ពីបានសន្ទនាជាមួយលោក ហ្សេលេនស្គី។
គួរបញ្ជាក់ថា រដ្ឋមន្ត្រីការបរទេសរុស្ស៉ី លោក សឺហ្គៃ ឡារ៉ូវ កាលពីថ្ងៃអាទិត្យសប្ដាហ៍មុន ត្រូវបានសាកសួរថាតើហេតុអ្វីបានជារុស្ស៉ីចាំបាច់ត្រូវតែកម្ទេច មនោគមន៍វិជ្ជាណាហ្ស៉ី នៅក្នុងប្រទេសអ៊ុយក្រែន ខណៈលោក ហ្សេលេនស្គីគឺជាជនជាតិជី្វហ្វ។ ឆ្លើយតបនឹងសំណួរនេះ លោក ឡារ៉ូវស្រាប់តែនិយាយថា ហ៊ីត្លែ ក៏មានដើមកំណើតជាជនជាតិជ្វីហ្វដែរ ហើយការអត្ថាធិប្បាយបែបនេះបង្កឱ្យមានទំនាក់ទំនងតានតឹងជាមួយអ៉ឺស្រាអែល ដែលបានទាមទារឱ្យ មូស្គូ ធ្វើការសូមទោស៕
ដោយ៖ Puthinews
Telegram Channel: Puthinews
Youtube Channel: Puthi News
Puthinews Android app: Puthi News
