អង្គការសហប្រជាជាតិបាននិយាយថា របបសឹកយោធាមីយ៉ាន់ម៉ាបានកាត់ទោសប្រហារជីវិតយ៉ាងហោចណាស់ ៧នាក់ថែមទៀតនាពេលថ្មីៗនេះ ដែលធ្វើឱ្យចំនួនអ្នកដែលទទួលទោសប្រហារជីវិតសរុបកើនដល់ ១៣៩នាក់ហើយ។
អ្នកនាំពាក្យរបបសឹកយោធាមិនបានឆ្លើយតបទៅនឹងការអំពាវនាវពីក្រៅប្រទេសដែលព្យាយាមសុំការបញ្ជាក់ពីការកាត់ទោសប្រហារជីវិតចុងក្រោយនេះទេ ដែលអង្គការសហប្រជាជាតិបានចោទប្រកាន់របបសឹកយោធាមីយ៉ាន់ម៉ាថា បានប្រើទោសប្រហារជីវិតជាឧបករណ៍ដើម្បីកម្ចាត់គូប្រជែង។
ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សបាននិយាយនៅក្នុងសេចក្តីថ្លែងការណ៍មួយថា មានអ្នកទោសយ៉ាងហោចណាស់ ៧នាក់ជានិស្សិត ត្រូវបានកាត់ទោសប្រហារជីវិតដោយតុលាការយោធា។
បើយោងតាមសារព័ត៌មានក្នុងស្រុកបានឱ្យដឹងថា និស្សិតនៃសាកលវិទ្យាល័យក្នុងទីក្រុងយ៉ាំងហ្គោនត្រូវបានចាប់ខ្លួនកាលពីខែមេសា ហើយត្រូវចោទប្រកាន់ពាក់ព័ន្ធនឹងហេតុការបាញ់ប្រហារនៅធនាគារ។
សហជីពនិស្សិតនៃសាកលវិទ្យាល័យ (ដាកង) បាននិយាយនៅក្នុងសេចក្តីថ្លែងការណ៍ថា៖ “ការកាត់ទោសប្រហារជីវិតនិស្សិតទាំងនេះ គឺជាការសងសឹករបស់ពួកយោធា”។ ទន្ទឹមគ្នានេះ អង្គការសហប្រជាជាតិក៏កំពុងស៊ើបអង្កេតរបាយការណ៍ដែលនិយាយថា មានសកម្មជនយុវជន ៤នាក់ផ្សេងទៀតត្រូវបានកាត់ទោសប្រហារជីវិតកាលពីថ្ងៃព្រហស្បតិ៍៕
ដោយ៖ Puthinews
Telegram Channel: Puthi News
Puthinews Android app: Puthi News
Youtube Channel: Puthi News
