ស្តាប់អត្ថបទជាសំឡេង
ភ្នំពេញ៖ មូលនិធិរូបិយវត្ថុអន្តរជាតិ (IMF) ប្រចាំប្រទេសកម្ពុជា បង្ហាញពីសុទិដ្ឋិនិយម ទៅលើការងើបឡើងវិញនៃសេដ្ឋកិច្ចកម្ពុជា និងបានវាយតម្លៃខ្ពស់ចំពោះវិធានការរបស់រាជរដ្ឋាភិបាលកម្ពុជា ក្នុងការគ្រប់គ្រងការរីករាលដាលនៃជំងឺកូវីដ-១៩។
នៅក្នុងជំនួបរវាង លោក ជា ចាន់តូ ទេសាភិបាល ធនាគារជាតិនៃកម្ពុជា ជាមួយលោក Yasuhisa Ojima តំណាងមូលនិធិរូបិយវត្ថុអន្តរជាតិ (IMF) ប្រចាំប្រទេសកម្ពុជា នាព្រឹកថ្ងៃច័ន្ទ ទី១១ ខែតុលា ឆ្នាំ២០២១នេះ ដើម្បីសម្តែងការគួរសម និងពិភាក្សាការងារនៅធនាគារជាតិនៃកម្ពុជា។
ចំពោះលទ្ធផលនៃការវាយតម្លៃបានបង្ហាញពីសុទិដ្ឋិនិយមរបស់ IMF ទៅលើការងើបឡើងវិញនៃសេដ្ឋកិច្ចកម្ពុជា និងបានវាយតម្លៃខ្ពស់ចំពោះវិធានការរបស់រាជរដ្ឋាភិបាលកម្ពុជា ក្នុងការគ្រប់គ្រងការរីករាលដាលនៃជំងឺកូវីដ-១៩ និងចំពោះវិធានការរបស់ធនាគារជាតិនៃកម្ពុជាដែលបានដាក់ចេញ ក្នុងការរួមចំណែកដល់កំណើនសេដ្ឋកិច្ច និងសម្រាលបន្ទុកដល់អាជីវករ និងប្រជាជនក្រីក្រ ដែលទទួលរងផលប៉ះពាល់ពីវិបត្តិជំងឺកូវីដ-១៩។
ជាមួយគ្នានេះដែរ លោកទេសាភិបាល ក៏បានវាយតម្លៃខ្ពស់ចំពោះវត្តមានរបស់ការិយាល័យតំណាងមូលនិធិរូបិយវត្ថុអន្តរជាតិប្រចាំប្រទេសកម្ពុជា ដែលបានដើរតួនាទីសំខាន់ក្នុងការសម្របសម្រួលដល់ការផ្តល់ជំនួយបច្ចេកទេស និងការពង្រឹងសមត្ថភាពដល់មន្ត្រីបុគ្គលិកក្នុងវិស័យធនាគារ និងហិរញ្ញវត្ថុ នៅកម្ពុជាផងដែរ៕
អត្ថបទ និងរូបភាពដោយ៖Puthi News
