ស្តាប់អត្ថបទជាសំឡេង
ខេត្តមណ្ឌលគិរី៖ ជ្រូកកណ្ដុរធម្មជាតិ និងប្រភេទជ្រូកកណ្ដុរកាត់ជ្រូកព្រៃ កំពុងមានការពេញនិយមទទួលទានយ៉ាងផុសផុល ពីសំណាក់បងប្អូនប្រជាពលរដ្ឋជាពិសេសអ្នកទេសចរ ដែលបានទៅលេងកម្សាន្តនៅខេត្តមណ្ឌលគិរី។
អាជីវករខ្វៃជ្រូកលក់នៅក្រុងសែនមនោរម្យ ខេត្តមណ្ឌលគិរី លោក ចាន់ ម៉ារី បានឱ្យដឹងថា រៀងរាល់ថ្ងៃលោកអាចលក់ជ្រូកកណ្ដុរពី០២ ទៅ០៥ក្បាល ស្ទើរតែមិនលស់មួយថ្ងៃណាសោះ។ ប៉ុន្តែនៅអំឡុងរយៈពេលថ្ងៃបុណ្យភ្ជុំបិណ្ឌកន្លងទៅនេះ លោកអាចលក់ជ្រូកកណ្ដុរក្នុងមួយថ្ងៃ៣០ ទៅ ៦០ ក្បាល មិនតែប៉ុណ្ណោះ ព្រោះតែមានការបញ្ជាទិញពីសំណាក់ អតិថិជនច្រើនពេក លោកបានផ្អាកការទទួលសេវាអាំងជ្រូក ដោយសារតែ ធ្វើមិនទាន់។
លោកម៉ារីបានបន្តថា ជ្រូកដែលលោកទទួលខ្វៃនេះមានពីរប្រភេទ មួយជាប្រភេទជាជ្រូកកណ្ដុរសុទ្ធធម្មជាតិ និងមួយប្រភេទទៀតជាពូជជ្រូកកណ្ដុរកាត់ជ្រូកព្រៃ ជ្រូកទាំងពីរនេះមានតម្លៃខុសគ្នាបន្តិចបន្តួច។ ជ្រូកកណ្ដុរ នៅពេលខ្វៃរួចអាចមានតម្លៃប៉ុន្មាន ៥០ ទៅ ៦០ ម៉ឺនរៀល ចំណែកជ្រូកកណ្ដុរកាត់ជ្រូកព្រៃនៅពេលខ្វៃរួច មានតម្លៃពី ៦០ ទៅ ៧០ ម៉ឺនរៀល។
អាជីវករខ្វៃជ្រូកក៏បានបញ្ជាក់ថា លោកបានដើរប្រមូលទិញជ្រូកនៅតាមភូមិឋានរបស់អ្នកស្រុកនៅតាមទីតាំងនានាជុំវិញខេត្តមណ្ឌលគិរី ហើយខ្លះទៀតក៏ត្រូវបានផ្ញើមកពីខាងខេត្តរតនគិរីដើម្បីបំពេញតម្រូវការជាក់ស្ដែង។
ដោយសារតែការពេញនិយមទទួលទានពីសំណាក់បងប្អូនប្រជាពលរដ្ឋស្ទើរពេញផ្ទៃប្រទេសជ្រូកកណ្ដុរធម្មជាតិនេបានជួយ ឱ្យបងប្អូនប្រជាកសិករមួយផ្នែក ដែលកំពុងតែចិញ្ចឹមនិងបង្កាត់ពូជជ្រូកប្រភេទនេះ ទទួលបាននូវកម្រិតជីវភាពល្អប្រសើរ ដោយសារកន្លងមកជ្រូកប្រភេទនេះ បើគេទិញមានតម្លៃមួយក្បាលតែ១០ ទៅ១៥ ម៉ឺនរៀលប៉ុណ្ណោះ។ ប៉ុន្តែក្រោយពេលដែលមានការពេញនិយមពីសំណាក់អ្នកទទួលទាន ជ្រូកប្រភេទនេះ បានឡើងថ្លៃមួយគុណជាពីរដែលជាការជួយសម្រួលដល់ជីវភាពរបស់ពួកគាត់បានល្អប្រសើរ។
លោក សុង ឃាង ប្រធានមន្ទីរកសិកម្មខេត្តមណ្ឌលគិរីបានឱ្យដឹងថា ទោះបីជាប្រភេទជ្រូកកណ្ដុរ ឬក៏កណ្ដុរកាត់ព្រៃនេះ កំពុងមានការពេញនិយម ប៉ុន្តែនៅក្នុងខេត្តមណ្ឌលគិរីមិនទាន់មាន កសិដ្ឋានចិញ្ចឹមក្នុងលក្ខណៈទ្រង់ទ្រាយធំទេ ពោលគឺមានត្រឹមតែការចិញ្ចឹមជាលក្ខណៈគ្រួសារ នៅតាមភូមិរបស់បងប្អូនជនជាតិដើមភាគតិច និងបងប្អូនជនជាតិខ្មែរមួយចំនួនប៉ុណ្ណោះ។
យ៉ាងណាក្នុងនាមលោក ថ្នាក់ដឹកនាំនៃមន្ទីរកសិកម្ម តែងលើកទឹកចិត្ត និងផ្ដល់ជាក្រុមការងារបច្ចេកទេសចុះណែនាំ ដល់បងប្អូនប្រជាកសិករ ដែលមានចំណាប់អារម្មណ៍ក្នុងការចិញ្ចឹមជ្រូក អាចយកបច្ចេកទេសល្អៗ ពីមន្ត្រីជំនាញដើម្បីទៅអនុវត្ត ក្នុងការបង្កើនប្រសិទ្ធភាពផលិតផលឲ្យកាន់តែមានគុណភាពទៅតាមតម្រូវការទីផ្សារ៕
អត្ថបទ និងរូបភាពដោយ៖ Puthinews
