ក្រុមមន្រ្តីសុខាភិបាលកំពូលៗរបស់អាមេរិកបានសម្តែង ការព្រមានជាថ្មីអំពីការកេីនឡេីងនៃករណីឆ្លងវីរុសកូវីដ-១៩ បំប្លែងខ្លួនថ្មី ដែលតា (Delta) នៅទូទាំងអាមេរិក ស្របពេលដែលមានការអំពាវនាវកាន់តែច្រើនឡើងឱ្យពលរដ្ឋទៅចាក់វ៉ាក់សាំងកូវីដ-១៩។
លោក អេនថូនី ហ្វូស៊ី (Anthony Fauci) ទីប្រឹក្សាកំពូលផ្នែកវេជ្ជសាស្ត្ររបស់លោកប្រធានាធិបតី ចូ បៃដិន (Joe Biden) បាននិយាយថា «រឿងអាក្រក់កំពុងកើតឡើង។ យើងត្រូវតែដឹងអំពីរឿងនេះ»។
លោក ហ្វូស៊ី អ្នកជំនាញកំពូលផ្នែកជំងឺឆ្លងរបស់អាមេរិកបាននិយាយថា លោកមិនរំពឹងថានឹងមានការដាក់កំហិតថ្នាក់ជាតិឲ្យចាក់វ៉ាក់សាំងកូវីដ-១៩ នោះទេ។
ប៉ុន្តែទោះជាយ៉ាងណា លោកបាននិយាយថាដរាបណានិយតកររដ្ឋបាលចំណីអាហារ និងឱសថផ្តល់ការអនុញ្ញាតពេញលេញសម្រាប់ការចាក់វ៉ាក់សាំងក្នុងរយៈពេលប៉ុន្មានសប្តាហ៍ខាងមុខនេះ លោកគាំទ្រយ៉ាងខ្លាំងឲ្យសាកលវិទ្យាល័យ, អាជីវកម្ម និងសហគ្រាសដទៃទៀតក្នុងស្រុកដាក់កំហិតឱ្យចាក់វ៉ាក់សាំង។
ពលរដ្ឋអាមេរិកជាង ១៦៦លាននាក់ហេីយបានចាក់វ៉ាក់សាំងកូវីដ-១៩ គ្រប់ដូស ដែលស្ទើរតែពាក់កណ្តាលនៃចំនួនពលរដ្ឋសរុប ខណៈដែលពលរដ្ឋអាយុ ១២ឆ្នាំ និងក្មេងជាងនេះ គឺមិនទាន់មានគោលការណ៍ច្បាស់លាស់អំពីការចាក់វ៉ាក់សាំងនេះទេ។
អាមេរិករហូតមកដល់ពេលនេះនៅតែជាប្រទេសដែលរងគ្រោះខ្លាំងជាងគេនៅលើពិភពលោកពីការឆ្លងរាតត្បាតរបស់វីរុសកូវីដ-១៩ ដោយមានអ្នកឆ្លងសរុបជាង ៣៦លាននាក់ក្នុងនោះមានអ្នកស្លាប់ជាង ៦៣ម៉ឺននាក់៕
អត្ថបទ និងរូបភាពដោយ Puthi News
