ស្តាប់អត្ថបទជាសំឡេង
ភ្នំពេញ៖ អភិបាលរាជធានីភ្នំពេញ លោក ឃួង ស្រេង បានណែនាំដល់អាជ្ញាធរដែនដី មន្ទីរជំនាញ កងកម្លាំងប្រដាប់អាវុធ ឱ្យរួមគ្នាទប់ទំនប់ស្ទឹងព្រែកត្នោត និងបញ្ជាឱ្យអាជ្ញាធរ សហការជាមួយកងកម្លាំង ធ្វើការដាក់តង់បាំងក្នុងទឹកត្រង់ជើងទំនប់សង្កត់បាវខ្សាច់ពីលើការពារ ឬបិទរន្ធនាគឱ្យបានជាប់ ជៀសវាងទឹកហូរច្រោះខាងក្រោម និងការពារឱ្យរឹងមាំ ជៀសវាងការគំរាមកំហែងដោយទឹក ដែលនឹងអាចនាំឱ្យមានគ្រោះមហន្តរាយដល់ប្រជាពលរដ្ឋ ដែលរស់នៅតាមបណ្តោយដងស្ទឹងព្រែកត្នោត។
![](https://puthinews.com/wp-content/uploads/2021/10/2021-10-26-15.21.32-1024x769.jpg)
លោក ឃួង ស្រេង បានប្រាប់ដល់អាជ្ញាធរខណ្ឌដង្កោដូចនេះ នៅព្រឹកថ្ងៃទី២៥ ខែតុលា ឆ្នាំ២០២១ ខណៈដឹកនាំអាជ្ញាធរ និងកងកម្លាំងប្រដាប់អាវុធ សហការជាមួយនឹងទាហាន ធ្វើអន្តរាគមន៍ទប់ស្កាត់កុំឱ្យទឹកជន់លិចលំនៅដ្ឋាន ប្រជាពលរដ្ឋនៅក្នុងខណ្ឌដង្កោ ខណៈដែលទឹកស្ទឹងព្រែកត្នោតបានហក់ឡើងយ៉ាងខ្លាំង។ បន្ថែមពីនេះលោកអភិបាល ក៏បានធ្វើការអំពាវនាវឱ្យប្រជាពលរដ្ឋទាំងអស់ ក៏ដូចជាអាជ្ញាធរ ត្រូវមានការប្រុងប្រយ័ត្នខ្ពស់ ចំពោះគ្រោះមហន្តរាយនេះ មានន័យថា បើមានហានិភ័យអ្វីកើតឡើង អាចបញ្ជៀសនូវគ្រោះមហន្តរាយធ្ងន់ធ្ងរនេះបាន សំខាន់គឺ រក្សាអាយុជីវិតប្រជាពលរដ្ឋឱ្យបានគង់វង់។
![](https://puthinews.com/wp-content/uploads/2021/10/photo_2021-10-26-15.21.58-1024x769.jpeg)
![](https://puthinews.com/wp-content/uploads/2021/10/photo_2021-10-26-15.21.58-1024x769.jpeg)
លោក ឃួង ស្រេង បានបញ្ជាក់ថា សន្ទុះទឹកបានហក់ឡើងខ្លាំង នៅសណ្តស្ទឹងព្រែកត្នោត ដោយសារតែមានការបើកទ្វាទឹកនៅខេត្តកំពង់ស្ពឺ ដែលធ្វើឱ្យទឹកហក់ឡើងខ្លាំង និងបានធ្វើឱ្យមានការគំរាមកំហែងដល់ប្រជាពលរដ្ឋដែលរស់នៅក្នុងសង្កាត់មួយចំនួនក្នុងខណ្ឌដង្កោ រាជធានីភ្នំពេញ។
សូមបញ្ជាក់ថា កម្លាំងដែលចុះជួយអន្តរាគមន៍ទប់ទំនប់ស្ទឹងព្រែកត្នោត ក្រៅពីអាជ្ញាធរខណ្ឌដង្កោ សង្កាត់ និងមន្ទីរពាក់ព័ន្ធ ក៏មានកម្លាំងទាហាចំនួន ៣០០នាក់ ក៏បានចុះមកជួយផងដែរ។ គិតត្រឹមម៉ោង ៦ព្រឹក ថ្ងៃទី២៥ ខែតុលា ឆ្នាំ២០២១ នៅស្ថានីយពាមឃ្លៃ ទឹកមានកម្ពស់ ៧,៦០ម៉ែត្រ (កើនឡើង ០,៩៦ម៉ែត្រធៀបព្រឹកម្សិលមិញ) ទំនប់រលាំងជ្រៃ កម្ពស់ទឹកខាងមុខទ្វារស្មើនឹង ៧,៨៦ម៉ែត្រ (+០,៨៦ម៉ែត្រខ្ពស់ជាងកម្រិតកម្ពស់ទ្វារបិទ/បើកទ្វារដោះទឹកកម្ពស់ ៣,០០ម៉ែត្រ×២សន្លឹក ៣,៥០ម៉ែត្រ×២សន្លឹក និង៤,០០ម៉ែត្រ×១សន្លឹក)។
![](https://puthinews.com/wp-content/uploads/2021/10/photo_2021-10-26-15.22.05-1024x766.jpeg)
![](https://puthinews.com/wp-content/uploads/2021/10/photo_2021-10-26-15.22.05-1024x766.jpeg)
ចំពោះទំនប់៧មករា មានកម្ពស់ទឹកខាងមុខទ្វារ ៦,០៩ម៉ែត្រ (+១,២៩ម៉ែត្រ ហូរលើកម្រិតកម្ពស់ទំនប់បង្ហៀរ)ស្ថានភាពទឹកក្នុងភូមិសាស្ត្រខណ្ឌដង្កោ កម្ពស់ទឹកខាងក្រោយទ្វារស្មើនឹង ៨,៩០ម៉ែត្រ (កើនឡើង +០,៧០ម៉ែត្រ ធៀបព្រឹកម្សិលមិញ) ធៀបនឹងកម្ពស់ទឹកមុខទ្វារ និងក្រោយទ្វារខុសគ្នា ០,១៩ម៉ែត្រ (បើកទ្វារដោះទឹកកម្ពស់ ៤,០០ម៉ែត្រ×៤សន្លឹក)៕
![](https://puthinews.com/wp-content/uploads/2021/10/photo_2021-10-26-15.22.07-1024x766.jpeg)
![](https://puthinews.com/wp-content/uploads/2021/10/photo_2021-10-26-15.22.07-1024x766.jpeg)
![](https://puthinews.com/wp-content/uploads/2021/10/photo_2021-10-26-15.22.10-1024x769.jpeg)
![](https://puthinews.com/wp-content/uploads/2021/10/photo_2021-10-26-15.22.10-1024x769.jpeg)
![](https://puthinews.com/wp-content/uploads/2021/10/photo_2021-10-26-15.22.24-1024x766.jpeg)
![](https://puthinews.com/wp-content/uploads/2021/10/photo_2021-10-26-15.22.24-1024x766.jpeg)
អត្ថបទ និងរូបភាពដោយ៖ Puthinews
Join Telegram group: ឯកសារចំណេះដឹងសាធារណៈជន