27 C
Phnom Penh
Friday, December 9, 2022

អភិបាលរាជធានីភ្នំពេញ ប្រាប់ឱ្យអាជ្ញាធរខណ្ឌទាំង ១៤ ត្រៀមលក្ខណៈការពារសន្តិសុខសណ្តាប់ធ្នាប់ និងវិធានការការពារជំងឺកូវីដ-១៩ នៅក្នុងពិធីបុណ្យដាក់បិណ្ឌ និងភ្ជុំបិណ្ឌ

ភ្នំពេញ៖ អភិបាលរាជធានីភ្នំពេញ  លោក ឃួង ស្រេង បានជំរុញឱ្យកម្លាំងមានសមត្ថកិច្ចទាំងអស់ចំណុះឱ្យគណៈបញ្ជាការឯកភាពរាជធានីភ្នំពេញ និងអាជ្ញាធរខណ្ឌទាំង១៤  ត្រូវពង្រឹងសន្តិសុខសណ្តាប់ធ្នាប់ឱ្យបានល្អ និងអនុវត្តឱ្យបានម៉ឺងម៉ាត់បំផុតជុំវិញវិធានការការពារជំងឺកូវីដ-១៩ នៅក្នុងពិធីបុណ្យដាក់បិណ្ឌ  និងភ្ជុំបិណ្ឌ ដែលនឹងចូលមកដល់នាពេលប៉ុន្មានថ្ងៃទៀតខាងមុខ។ 

ក្នុងកិច្ចប្រជុំតាមរយៈការបញ្ជូនរូបភាព និងសំឡេង ( Video Conference ) របស់គណៈបញ្ជាការឯកភាពរាជធានីភ្នំពេញនៅល្ងាចថ្ងៃទី២០ ខែកញ្ញា ឆ្នាំ២០២១ លោក  ឃួង ស្រេង បានលើកឡើងថា ចំពោះកងកម្លាំងមានសមត្ថកិច្ចដែលមានតួនាទីអនុវត្តការងារក្នុងកិច្ចការពារសន្តិសុខ សុវត្ថិភាពជូនប្រជាពលរដ្ឋនៅក្នុងពិធីបុណ្យដាក់បិណ្ឌ  និងភ្ជុំបិណ្ឌខាងមុខ ត្រូវតែមានការប្រុងប្រយ័ត្នឱ្យបានខ្ពស់បំផុតចំពោះការឆ្លងជំងឺកូវីដ-១៩ និងត្រូវចេះការពារខ្លួនឯង ទោះបីមានបទពិសោធន៍ នាពេលកន្លងមកហើយក្តី។  ក្រៅពីនេះក៏បានណែនាំឱ្យប្រធានមន្ទីរធម្មការ  និងសាសនារាជធានីភ្នំពេញ ត្រូវកោះប្រជុំជា មួយគណៈកម្មការ អាចារ្យវត្តទាំង១៥១វត្ត  នៅក្នុងរាជធានីភ្នំពេញដើម្បីត្រៀមលក្ខណសម្បត្តិឱ្យបានគ្រប់គ្រាន់ ក្នុងការរៀបចំវត្តអារាម ធ្វើយ៉ាងណាមិនឱ្យមានហានិភ័យឆ្លងជំងឺកូវីដ-១៩ នៅក្នុងពិធីបុណ្យដាក់បិណ្ឌ  និងភ្ជុំបិណ្ឌ  ហើយក្នុងវត្តនីមួយៗនៅតាមខ្លោងទ្វារវត្តត្រូវបាញ់អាល់កុល  និងវាស់កម្តៅ។

លោក ឃួង ស្រេង បានបញ្ជាក់ផងដែរថា ក្រោយការចាក់វ៉ាក់សាំងជូនពលរដ្ឋនៅរាជធានីភ្នំពេញ និងបច្ចុប្បន្នកំពុងចាក់វ៉ាក់សាំងជូនកុមារអាយុពី៦ឆ្នាំដល់ក្រោម១២ឆ្នាំ  ឃើញថា ការឆ្លងជំងឺកូវីដ-១៩ បានថយចុះយ៉ាងខ្លាំងនៅភ្នំពេញ ដែលធ្វើឱ្យដើរទៅមុខជាជំហានៗ ក្នុងនោះបានបើកឱ្យមានការធ្វើចរាចរណ៍ឡើងវិញរបស់ប្រជាពលរដ្ឋ បើកឱ្យដំណើរការរោងចក្រឡើងវិញ ហើយនៅពេលថ្មីៗនេះបានបើកសាលារៀនថ្នាក់អនុវិទ្យាល័យ  និងវិទ្យាល័យឡើងវិញថែមទៀត។  បន្ថែមពីលើនេះទៀត កងកម្លាំងមានសមត្ថកិច្ច អាជ្ញាធរខណ្ឌទាំង១៤  ត្រូវល្បាតមើលថែសម្បត្តិសាធារណៈរបស់រដ្ឋ ត្រូវការពារឱ្យបានគង់វង្សពីអំពើចោរកម្ម ៕

ត្ថបទ និងរូបភាពដោយ៖ Puthi News

- Advertisement -spot_imgspot_img
- Advertisement -spot_imgspot_img

អានបន្ត

spot_img
spot_imgspot_img