អង្គការលើកលែងទោសអន្តរជាតិបានប្រកាសថា កងកម្លាំងរដ្ឋាភិបាលអេត្យូពី, កងជីវពលក្នុងតំបន់អាំហារ៉ា (Amhara) និងកងកម្លាំងរដ្ឋាភិបាលអេរីត្រេ បានចាប់រំលោភជាប្រព័ន្ធនលើស្ត្រី និងក្មេងស្រីរាប់រយនាក់នៅក្នុងជម្លោះ នៅតំបន់ធីហ្គ្រេ (Tigray) ស្ថិតនៅភាគខាងជើងប្រទេសអេត្យូពី។
នៅក្នុងផ្នែកមួយនៃរបាយការណ៍ថ្មីរបស់ខ្លួន អង្គការលេីកលែងទោសអន្តរជាតិបានជួបសម្ភាសន៍ជាមួយក្រុមអ្នករួចជីវិតពីការរំលោភ និងអំពើហិង្សាផ្លូវភេទចំនួន ៦៣នាក់ពីតំបន់ធីហ្គ្រេ (Tigray) ព្រមទាំងបុគ្គលិកសុខាភិបាលដែលកំពុងធ្វើការជាមួយអ្នករួចជីវិត។
ក្នុងចំណោមអ្នករួចជីវិតទាំងនោះ ជនរងគ្រោះ ៣៨នាក់បាននិយាយថា ការរំលោភនេះប្រព្រឹត្តដោយក្រុមទាហានរបស់ប្រទេសអេរីត្រេ។
មន្ត្រីស្រាវជ្រាវនៃអង្គការរលេីកលែងទោសអន្តរជាតិបានប្រាប់ប្រព័ន្ធផ្សព្វផ្សាយថា «ក្រុមជនរងគ្រោះត្រូវបានគេឃុំខ្លួនជាង ២៤ម៉ោង និងក្នុងករណីខ្លះគឺជាច្រើនសប្តាហ៍ ហេីយពួកគេត្រូវបានរំលោភដោយក្រុមទាហាន»។
ប្រទេសអេត្យូពី និងអេរីត្រេបានរិះគន់របាយការណ៍នេះ ដោយក្រសួងការបរទេសអេត្យូពីបានថ្លែងថា រដ្ឋាភិបាល «ថ្កោលទោសអំពើហិង្សាផ្លូវភេទនៅគ្រប់កាលៈទេសៈ រួមទាំងក្នុងស្ថានភាពជម្លោះ ហើយមានគោលនយោបាយគ្មានការអត់ឱន»។
សង្គ្រាមរយៈពេល ៨ខែបានផ្ទុះឡើងនៅក្នុងខែវិច្ឆិការវាងកងកម្លាំងរដ្ឋាភិបាលអេត្យូពី និងកងកម្លាំងបះបោរនៅក្នុងតំបន់ធីហ្គ្រេ (Tigray) នៅពេលដែលនាយករដ្ឋមន្រ្តីប្រទេសអេត្យូពីបានបញ្ជាឱ្យមានការវាយលុកប្រឆាំងនឹងកងកម្លាំងបះបោរនៅក្នុងតំបន់នេះ។ នៅពេលនោះកងកម្លាំងរបស់ប្រទេសអេរីត្រេក៏បានចូលរួមជួយកងកម្លាំងរដ្ឋាភិបាលអូត្យូពីដែរ។
ការប្រយុទ្ធគ្នានេះបានបង្ខំឲ្យមនុស្សជាង ២លាននាក់ភៀសខ្លួនចេញពីលំនៅដ្ឋានរបស់ពួកគេ ហើយមនុស្សជាង ៥ម៉ឺននាក់បានភៀសខ្លួនចូលទៅក្នុងប្រទេសស៊ូដង់ដែលនៅជិតខាង៕
អត្ថបទ និងរូបភាពដោយ៖ Puthi News
