![](https://puthinews.com/wp-content/uploads/2022/01/photo_2022-01-12-11.56.48-1024x576.jpeg)
ភ្នំពេញ ៖ លោក ប៉ៃ សំបូរ អគ្គលេខាធិការវេទិកាសម្ព័ន្ធសង្គមស៊ីវិល នៃទីស្តីការគណៈរដ្ឋមន្ត្រី នាព្រឹកថ្ងៃទី១១ ខែមករា ឆ្នាំ២០២២នេះ បានអំពាវនាវ ដល់សិស្សានុសិស្សទាំងអស់ បន្តនូវការអនុវត្តវិធានការការពារ “៣កុំ ៣កាពារ” និង “២ចូលរួម” ដើម្បីចូលរួមទប់ស្កាត់ការរាតត្បាតពីជំងឺកូវីដ-១៩ ជាពិសេសមេរោគបំប្លែងថ្មី អូមីក្រុង តាមការណែនាំរបស់ក្រសួងសុខាភិបាល ក្នុងឱកាសបើកបវេសនកាលសិក្សាឆ្នាំថ្មី។
ការអំពាវនាវនេះ លោក ប៉ៃ សំបូរ បានធ្វើឡើងក្នុងឱកាសដឹកនាំក្រុមការងារ នាំយកអំណោយ “កញ្ចប់ក្តីស្រឡាញ់” មានជាកាតាប និងសម្ភារៈសិក្សា ចែកជូនកុមារា-កុមារី ដែលជាសិស្សានុសិស្ស ចំនួន៤០០នាក់ នៅសាលាបឋមសិក្សាមិត្តភាពកម្ពុជា-ចិន ឃ្មួញ ស្ថិតក្នុងសង្កាត់ឃ្មួញ រាជធានីភ្នំពេញ ដែលអំណោយនេះ ទទួលបានពីមូលនិធិ CFPD របស់ប្រទេសចិន តាមរយៈវេទិកាសម្ព័ន្ធសង្គមស៊ីវិល។
![](https://puthinews.com/wp-content/uploads/2022/01/photo_2022-01-12-11.56.49-1-1024x576.jpeg)
![](https://puthinews.com/wp-content/uploads/2022/01/photo_2022-01-12-11.56.49-1-1024x576.jpeg)
“យើងអាចភ្លេចកូវីដ តែកូវីដមិនអាចភ្លេចយើងទេ, ដូច្នេះសូមប្អូនៗទាំងអស់គ្នា ចូលរួមអនុវត្តវិធានការ ៣កុំ ៣ការពារ និង២ចូលរួម ដើម្បីការពារខ្លួន ពីជំងឺឆ្លងសកលកូវីដ១៩ តាមការណែនាំរបស់ក្រសួងសុខាភិបាល នៃព្រះរាជាណាចក្រកម្ពុជា”, នេះបើតាមលោក ប៉ៃ សំបូរ បានលើកឡើង។
លោកបន្ថែមថា “ជាមួយគ្នានោះ ក៏សូមអំពាវនាវដល់សិស្សានុសិស្សទាំងអស់ ខិតខំប្រឹងប្រែងក្នុងការសិក្សា ដើម្បីក្លាយជាធនធានដ៏សំខាន់ ក្នុងការអភិវឌ្ឍប្រទេសជាតិ នៅជំនាន់ខាងមុខបន្តទៀត”។
![](https://puthinews.com/wp-content/uploads/2022/01/photo_2022-01-12-11.56.49-1024x576.jpeg)
![](https://puthinews.com/wp-content/uploads/2022/01/photo_2022-01-12-11.56.49-1024x576.jpeg)
បើតាមលោក ប៉ៃ សំបូរ សកម្មភាពសប្បុរសធម៌នេះ គឺជាការចូលរួមចំណែករបស់ភាគីចិន ក្នុងការកាត់បន្ថយភាពក្រីក្រ និងចែករំលែកនូវក្តីស្រឡាញ់ ជូនដល់ប្រជាជនកម្ពុជា។ នេះគឺជាលើកទី៣ហើយ ដែលវេទិកាសម្ព័ន្ធសង្គមស៊ីវិល បានចែកជូនអំណោយកញ្ចប់ក្តីស្រឡាញ់ ជូនដល់សិស្សានុសិស្សកម្ពុជា ហើយតាមការគ្រោងទុក នឹងបន្តចែកជូនដល់សិស្សានុសិស្ស នៅតំបន់ផ្សេងបន្ថែមទៀត នាពេលឆាប់ៗខាងមុខនេះ ដើម្បីចែករំលែកនូវក្តីស្រឡាញ់ និងជាការលើកទឹកចិត្ត ឱ្យសិស្សនុសិស្ស ខិតខំប្រឹងប្រែង ក្នុងការសិក្សា ដើម្បីក្លាយជាធនធានមនុស្ស ចូលរួមអភិវឌ្ឍន៍ប្រទេសជាតិ នាពេលអនាគត៕
![](https://puthinews.com/wp-content/uploads/2022/01/photo_2022-01-12-11.56.51-1024x576.jpeg)
![](https://puthinews.com/wp-content/uploads/2022/01/photo_2022-01-12-11.56.51-1024x576.jpeg)
អត្ថបទ និងរូបភាពដោយ៖ Puthinews
Telegram group: Puthinews
YOUTUBE | Puthinews
WEBSITE | Puthinews