សមត្ថកិច្ចក្រុងព្រះសីហនុ បញ្ជាក់ថា ករណីឃើញទូកកន្ទុយវែងសំរាប់ស្ទូចត្រីមួយគ្រឿងបានលិច ប្រហែល ២០ម៉ែត្រ ពីមុខឆ្នេរហាវ៉ៃ គឺបានលិចតាំងម៉ោង ៤ទៀបភ្លឺ ថ្ងៃទី៧ ខែមិថុនា ឆ្នាំ២០២៤។

តាមការសាកសួររបស់នគរបាលចរាចរណ៍ផ្លូវទឹក ទៅកាន់ប្រពន្ធម្ចាស់ទូកបញ្ជាក់ថា ទូករបស់គាត់បានចតទុកប្រហែល២០ម៉ែត្រពីឆ្នេរ ពុំមានដឹកភ្ញៀវឡេីយ ហេីយគាត់ប្រាប់បន្តថា មូលហេតុដែលទូករបស់គាត់លិចដោយសារទូករបស់គាត់ជ្រាបទឹកតាមបាតខាងក្រោម ហេីយម៉ូទ័របូមទឹកអូតូក៏ខូច ទេីបបណ្តាលអោយជ្រាបទឹកលិចតែម្តង ។
ម្ចាស់ទូកខាងលេីមានឈ្មោះ ស៊ុ សារ៉ាត់ ភេទប្រុស អាយុ៣៧ឆ្នាំ មុខរបរម្ចាស់ទូកកន្ទុយវែងស្ទូចត្រី មានស្រុកកំណេីតឃុំល្វា ស្រុកព្រះស្តេច ខេត្តព្រៃវែង បច្ចុប្បន្នស្នាក់នៅភូមិ១ សង្កាត់៤ ក្រុង-ខេត្តព្រះសីហនុ ។
ប្រពន្ធម្ចាស់ទូកបញ្ជាក់បន្ថែមថា នៅវេលាម៉ោង ១៤ និង១០នាទី ថ្ងៃខែឆ្នាំដដែល ប្តីរបស់គាត់បានពឹងទូកអ្នកស្គាល់គ្នា មានមនុស្សប្រុសចំនួន ៣នាក់ដេីម្បីជួយស្តារទូក អូសយកទៅជួសជុលហើយ៕