ស្តាប់អត្ថបទជាសម្លេង
កំពង់ឆ្នាំង៖ ជំងឺដុំពកនៅលើស្បែកសត្វគោ ក្របី ដែលជាជំងឺឆ្លងប្រភេទថ្មី នៅកម្ពុជា កំពុងឆ្លងរាលដាលទៅលើសត្វគោក្របី របស់ប្រជាពលរដ្ឋ នៅតាមបណ្តាស្រុកនានា ក្នុងខេត្តកំពង់ឆ្នាំង។
លោក ក្រឹង សំអាត ប្រធានការិយាល័យផលិតកម្ម និងបសុព្យាបាល នៃមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង បានឱ្យដឹងថា គិតត្រឹមថ្ងៃទី១៩ ខែសីហា ឆ្នាំ២០២១ មានសត្វគោ ក្របីរបស់ប្រជាពលរដ្ឋ នៅតាមបណ្តាស្រុកនានា ក្នុងខេត្តកំពង់ឆ្នាំង ចំនួន ១.៥៤៩ក្បាល បានកើតជំងឺដុំពកនៅលើស្បែកដែលជាជំងឺឆ្លងប្រភេទថ្មីនេះ។
លោកប្រធានការិយាល័យផលិតកម្មនិងបសុព្យាបាល បានឱ្យដឹងថា ជំងឺនេះ ភាគច្រើនកើតទៅលើសត្វគោ ចំពោះសត្វក្របីមានតិចតួចប៉ុណ្ណោះ។ ក្រោយពីផ្ទុះជំងឺនេះ មន្ត្រីពេទ្យសត្វបានចុះអន្តរាគមន៍ ជាបន្តបន្ទាប់ ដោយព្យាបាលឱ្យជាសះស្បើយចំនួន៣៣៩ក្បាល និងកំពុងព្យាបាលចំនួន ១.២០៤ក្បាល និងងាប់ចំនួន0៦ក្បាល។ ហើយស្រុកដែលមានសត្វឈឺច្រើនជាងគេ គឺស្រុកបរិបូរណ៍។
![](https://puthinews.com/wp-content/uploads/2021/08/photo_2021-08-20-09.49.47.jpeg)
លោក ក្រឹង សំអាត បានឱ្យដឹងទៀតថា ជំងឺដុំពកស្បែកគោ ក្រី ភាគច្រើនឆ្លងតាមសត្វល្អិតដូចជា មូស តាប៉ោម ការនាំគោ ក្របីដែលមានជំងឺពីតំបន់ផ្សេង ឆ្លងតាមរយៈការស៊ីចំណី និងផឹកទឹករួមគ្នា ការបង្កាត់ពូជការព្យាបាល (បើមិនដូម្ជុល) ឬការប៉ះពាល់ផ្ទាល់។
ជំងឺនេះបង្កដោយវីរុស ហើយពុំមានថ្នាំព្យាបាលមានប្រសិទ្ធភាពទេ។ ការព្យាបាលបំបាត់រោគសញ្ញា អាចជួយបានដូចជា ការប្រើថ្នាំបំបាត់ការឈឺចាប់ និងរលាករួមផ្សំជាមួយថ្នាំផ្សះ ដើម្បីកំចាត់ពួកបាត់តេរី ដែលឆ្លងចូលតាមក្រោយ៕
![](https://puthinews.com/wp-content/uploads/2021/08/photo_2021-08-20-09.49.31-1024x682.jpeg)
![](https://puthinews.com/wp-content/uploads/2021/08/photo_2021-08-20-09.49.31-1024x682.jpeg)
![](https://puthinews.com/wp-content/uploads/2021/08/photo_2021-08-20-09.49.36-1024x709.jpeg)
![](https://puthinews.com/wp-content/uploads/2021/08/photo_2021-08-20-09.49.36-1024x709.jpeg)
អត្ថបទ និងរូបភាពដោយ៖ Puthi News