មន្រី្តជាន់ខ្ពស់សុខាភិបាល ការរៀនរស់ នៅជាមួយ នឹងការបន្តកិច្ចការពារការចម្លងរោគជាប្រធានបទ សម្រាប់យើងយកទៅគិត និងរៀបចំខ្លួនដើម្បីត្រៀមលក្ខណ:ទុកជាមុន

ភ្នំពេញ៖ លោកស្រីឱ វណ្ណឌីន រដ្ឋលេខាធិការ  និងជាអ្នកនាំពាក្យក្រសួងសុខាភិបាល,  ប្រធានគណកម្មការចំពោះកិច្ចចាក់វ៉ាក់សាំងកូវីដ-១៩  ក្នុងក្របខណ្ឌទូទាំងប្រទេស  (គ.វ.ក-១៩),  ប្រធានអនុគណកម្មការអប់រំ  បណ្តុះបណ្តាល  និងទំនាក់ទំនងសាធារណ: និងជាអ្នកនាំពាក្យនៃគណកម្មការអន្តរក្រសួងប្រយុទ្ធនឹងជំងឺកូវីដ-១៩ ថ្លែងថាការរៀនរស់នៅ  ជាមួយនឹងការបន្តកិច្ចការពារការចម្លងរោគ  ជាប្រធានបទសម្រាប់យើងយកទៅគិត  និងរៀបចំខ្លួន  ដោយត្រៀមលក្ខណ: ទុកជាមុន  ជាមួយនឹងការវាយតម្លៃហានិភ័យ  បន្ធូរបន្ថយវិធានការ  និងជំរុញការចាក់វ៉ាក់សាំងឱ្យបានលឿន  ប្រជាជនជាច្រើនទទួលបានវ៉ាក់សាំង  និងបានគ្រប់ប្រទេសផងដែរ។ក្នុងដំណើរការ និងការទទួលស្គាល់នូវបណ្ណបញ្ជាក់ចាក់វ៉ាក់សាំងក្នុងបណ្តាប្រទេសអាស៊ាន  ក៏ជាចំណុចលើកឡើងសម្រាប់ការយល់ដឹង ផងដែរ។  ការសាមគ្គីភាពក្នុងប្រទេស  ក្នុងតំបន់  និងលើសកលលោក  ជាមួយនឹងកិច្ចសហប្រតិបត្តិការបែបពហុវិស័យ  ជាជំហានដែលយើងគួរតែបោះទៅមុខ  ដោយមិនត្រូវមានការបែងចែក ពិភពលោក  មានការរើសអើង  រួមទាំងវ៉ាក់សាំងផងដែរ។ កិច្ចសហការជាមួយដៃគូរ  ដូចជាអង្គការសុខភាពពិភពលោក  និងអង្គការផ្សេងៗ  ជាតម្រូវការរួមគ្នាដើម្បីជួយគ្នាទៅវិញទៅមក  វះកាត់  និងឆ្លងកាត់ចេញពីប្រអប់កូវីដ-១៩  ទាំងអស់គ្នា  សំដៅឆ្ពោះទៅ វត្ថុបំណង របស់យើងទាំងអស់គ្នា  គឺ “សហការដើម្បីសុខភាព  និងក្តីរីករាយកាន់តែប្រសើរឡើងនៅលើសកលលោកក្រោយពីការរាតត្បាតជំងឺ ។ 

លោកស្រីវេជ្ជបណ្ឌិត  ឱ  វណ្ណឌីន  មានប្រសាសន៍បែបនេះ ក្នុងឱកាសតំណាងសាស្រ្តាចារ្យ  ម៉ម  ប៊ុនហេង  រដ្ឋមន្ត្រីក្រសួងសុខាភិបាលបានដឹកនាំគណប្រតិភូចូលរួមកិច្ចប្រជុំពិសេសថ្នាក់រដ្ឋមន្ត្រីសម្រាប់អាស៊ានឌីជីថលសុខភាពសាធារណៈ  ក្រោមប្រធានបទ  «សហការដើម្បីសុខភាព  និងក្តីរីករាយកាន់តែប្រសើរឡើងនៅលើសកលលោកក្រោយពីការរាតត្បាតជំងឺ»ពីថ្ងៃទី៦  ដល់ទី៧  ខែតុលា  ឆ្នាំ២០២១ ប្រារព្វធ្វើឡើងនៅនាព្រឹកថ្ងៃទី៦  ខែតុលា  ឆ្នាំ២០២១ ។

លោកស្រីរដ្ឋលេខាធិការ  ឱ  វណ្ណឌីន  ត្រូវបានជ្រើសរើសធ្វើជាវាគ្មិនម្នាក់ក្នុងចំណោមវាគ្មិនជាច្រើនទៀត  នៅក្នុងរបៀបវារ:  ពិភាក្សាជជែកវែកញែកអំពីបទពិសោធន៍  និងផលប៉ះពាល់សុខភាពនិងសេដ្ឋកិច្ច  ព្រមទាំងបញ្ហាប្រឈមដែលជួបប្រទះក្នុងកំឡុងពេលអន្តរាគមន៍ឆ្លើយតបទៅនឹងការរាតត្បាត  នៃជំងឺកូវីដ-១៩  ក្នុងតំបន់  ជាពិសេសនៅក្នុងប្រទេស។  

ជាមួយគ្នានេះ   លោកស្រីរដ្ឋលេខាធិការ  ឱ  វណ្ណឌីន  បានបញ្ជាក់ពីសារៈសំខាន់បំផុតដែលមិនអាចខ្វះបាននូវភាពដឹកនាំដ៏ខ្លាំង  ចំទិសដៅ  រហ័សរហួន  និងវៃឆ្លាត របស់សម្តេចអគ្គមហាសេនាបតីតេជោ  ហ៊ុន  សែន  នាយករដ្ឋមន្ត្រីនៃព្រះរាជាណាចក្រកម្ពុជា  ក្នុងការឆ្លេីយតប  ដាក់ចេញវិធានការបត់បែន  សំដៅគ្រប់គ្រងបានល្អនូវស្ថានភាពជំងឺកូវីដ-១៩  នៅកម្ពុជា  ជាពិសេសលោកស្រី  បានលើកបង្ហាញពីភាពជោគជ័យរបស់កម្ពុជាក្នុងការអនុវត្តន៍គោលនយោបាយចាក់វ៉ាក់សាំងកូវីដ-១៩  នៅទូទាំងប្រទេស  និងលទ្ធផលសម្រេចបានលើកិច្ចការដ៏សំខាន់នេះ  នៅក្នុងបរិបទប្រយុទ្ធនឹងជំងឺកូវីដ-១៩។  ការគ្រប់គ្រងការងារ  និងទិន្នន័យតាមប្រព័ន្ធឌីជីថល  ក៏ត្រូវបានលើកឡើងជាបែបបទពិសោធន៍មួយផ្នែករបស់កម្ពុជា  ទន្ទឹមនឹងការបញ្ជាក់របស់លោកស្រីជូនអង្គប្រជុំដែរថា  ការដឹកនាំខ្លាំង  និងដាក់ចេញយន្តការត្រឹមត្រូវ  ព្រមទាំងការវិនិយោគលើវិស័យសុខភាពសាធារណ:នេះ  និងការពង្រឹងប្រព័ន្ធសុខាភិបាលនៃប្រទេសសមាជិក អាស៊ាន  មិនត្រូវមើលលរំលងឡើយនៅក្នុងផែនការត្រៀមលក្ខណ: តទៅមុខទៀត  សម្រាប់ឆ្លើយតបការរាតត្បាតនាពេលខាងមុខ  ហើយយើងត្រូវរៀនរស់នៅក្នុងប្រក្រតីភាពថ្មី  ក្នុងបរិបទដែលវីរុសកូវីដ-១៩  វិវត្តន៍បម្លែងខ្លួន  ដោយយើងមិនអាចនឹងសម្លាប់បានអស់នោះឡើយដោយយើងមិនត្រូវជាប់គាំងក្នុងប្រអប់កូវីដ-១៩  ហើយយើងត្រូវត្រួតត្រាកូវីដ-១៩  ជាជាងទុកឱ្យកូវីដ-១៩  ត្រួតត្រាជីវិតរស់នៅប្រចាំថ្ងៃរបស់យើង។ គោលបំណងនៃកិច្ចប្រជុំ  គឺពិភាក្សាអំពីប្រធានបទផុសចេញពីឈុតឆាកនានានៅពីក្រោយការរាតត្បាតជំងឺ  និងមេរៀនបទពិសោធន៍កើតចេញពីការរាតត្បាតជំងឺកូវីដ-១៩  សំដៅឆ្ពោះទៅការវិនិយោគ  និងផ្តល់ហិញ្ញវត្ថុ  ព្រមទាំងបង្កើនការយល់ដឹង  និងរួមកិច្ចសហការសម្រាប់សុខភាពសាធារណ:៕

អត្ថបទ និងរូបភាពដោយ៖ Puthinews