ស្តាប់អត្ថបទជាសម្លេង
រដ្ឋាភិបាលប្រទេសបួគីណាហ្វាសូ កាលពីថ្ងៃព្រហស្បតិ៍ បានប្រកាសនៅក្នុងសេចក្តីថ្លែងការណ៍ថា ចំនួនអ្នកស្លាប់នៅក្នុងការវាយប្រហារទៅលើពលរដ្ឋស៊ីវិល និងទាហាននៅភាគខាងជើងប្រទេស បានកើនឡើងដល់ ៨០នាក់។
ការវាយប្រហារនេះបានកើតឡើង កាលពីថ្ងៃពុធ នៅពេលដែលក្រុមសកម្មប្រយុទ្ធអ៊ីស្លាមបានវាយឆ្មក់ក្បួនរថយន្តស៊ីវិលមួយដែលមានកងកម្លាំងប៉ូលិសយោធាបេីកអមការពារនៅជិតទីក្រុងអាប៊ីនដា (Arbinda)។
សេចក្ដីថ្លែងការណ៍របស់រដ្ឋាភិបាល និងយោធាបានឲ្យដឹងថា ពលរដ្ឋស៊ីវិល ៥៩នាក់, កងជីវពលគាំទ្ររដ្ឋាភិបាលចំនួន ៦នាក់ និងប៉ូលិសយោធាចំនួន ១៥នាក់បានបាត់បង់ជីវិត។
សេចក្ដីថ្លែងការណ៍នោះបានបន្ថែមថា ក្រុមសកម្មប្រយុទ្ធអ៊ីស្លាមចំនួន ៥៨នាក់ត្រូវបានសម្លាប់នៅក្នុងការប្រយុទ្ធគ្នាជាមួយកងកម្លាំងសន្តិសុខ។
ប្រធានាធិបតីប្រទេសបួគីណាហ្វាសូបានបញ្ជាឱ្យកាន់ទុក្ខនៅទូទាំងប្រទេសរយៈពេលបីថ្ងៃ បន្ទាប់ពីមានការវាយប្រហារនេះដែលបានកេីតឡេីងនៅតាមផ្លូវពីទីក្រុងហ្គរហ្គាដជី (Gorgadji) និងអាប៊ីនដា (Arbinda) ដែលជាតំបន់មួយមានអំពេីហិង្សាកេីតឡេីងច្រេីនបំផុតនៅក្នុងប្រទេសបួគីណាហ្វាសូ។
ក្រុមសកម្មប្រយុទ្ធដែលមានទំនាក់ទំនងជាមួយក្រុមអាល់កៃដា និងក្រុមរដ្ឋអ៊ីស្លាម តែងតែធ្វើការវាយប្រហារនៅក្នុងប្រទេសបួគីណាហ្វាសូ និងប្រទេសជិតខាងរួមមានម៉ាលី និងនីហ្សេ ដោយបានសម្លាប់ពលរដ្ឋស៊ីវិលរាប់រយនាក់ក្នុងឆ្នាំនេះ៕
អត្ថបទ និងរូបភាពដោយ Puthinews
