ស្តាប់អត្ថបទជាសម្លេង
បន្ទាយមានជ័យ៖ ពលករខ្មែរប្រុស ស្រីចំនួន០៩នាក់ ត្រូវបានយោធាថៃឃាត់ខ្លួនកាលពីថ្ងៃទី១០ ខែកញ្ញា ឆ្នាំ២០២១ខណៈពួកគេព្យាយាមឆ្លងដែនចូលក្នុងទឹកដីថៃ ដោយមានមេខ្យល់អ្នកនាំផ្លូវ ក្នុងម្នាក់ចំណាយប្រាក់ចាប់ពី ៥ ០០០ ទៅ៥ ៥០០បាត ដើម្បីឆ្លងដែនទៅធ្វើការនៅប្រទេសថៃ។
យោងតាមរបាយការណ៍របស់សមត្ថកិច្ចព្រំដែន បានឱ្យដឹងថា មេបញ្ជាការកងកម្លាំងបូរផារបស់ថៃ បានបញ្ជាឱ្យកម្លាំងការពារព្រំដែនរឹតបន្តឹងការលួចឆ្លងចូលក្នុងប្រទេសដោយខុសច្បាប់ អំឡុងស្ថានការណ៍កូវីដ-១៩ រាតត្បាតជាបន្តបន្ទាប់ ដោយសមត្ថកិច្ចទាហានអង្គភាពចំពោះកិច្ចតាព្រះយ៉ា សហការជាមួយកងរយទី៣ នគបាលការពារព្រំដែនទី១២ ស្កាត់ចាប់ពលករខ្មែរបានសរុប០៩នាក់ ស្រី០៤នាក់ នៅបរិវេណព្រៃដំឡូង ក្នុងភូមិខៅលូកឆាង ឃុំ ស្រុកតាព្រះយ៉ា ខេត្តស្រះកែវ។
ក្រោយការឃាត់ខ្លួនពលករខ្មែរទាំងអស់បានប្រាប់ថា ពួកគេទៅធ្វើការនៅក្រុងបាងកកចំនួន០២នាក់ (ធ្វេីការងារនៅក្នុងហាងលក់អាហារ) និងចំនួន០៧នាក់ ទៀតទៅធ្វើការនៅខេត្ត ណៈខន ប៉ះធុម (ការងារសំណង់) តែពួកគេមិនស្គាល់កន្លែងធ្វើការ ដោយសារមេខ្យល់អ្នកចាត់បញ្ជូនទៅតាមកន្លែងធ្វើការផ្សេងៗ។
ក្រោយការសួរនាំរបស់សមត្ថកិច្ចថៃ និងធ្វើកំណត់ហេតុចាប់ខ្លួន នៅទីបញ្ជាការកងរយទី៣ និងអនុវត្តតាមវិធានរបស់ផ្នែកសុខាភិបាល បន្ទាប់មកក៏បានបញ្ជូនឱ្យត្រឡប់ទៅប្រទេសកម្ពុជាវិញ តាមច្រកអូរបីជាន់ ក្នុងស្រុកអូរជ្រៅខេត្តបន្ទាយមានជ័យ ដោយប្រគល់ទៅឱ្យសមត្ថកិច្ចកម្ពុជាចាត់ការតាមនីតិវិធី៕
អត្ថបទ និងរូបភាពដោយ Puthi News
