ស្តាប់អត្ថបទជាសម្លេង
ប្រព័ន្ធផ្សព្វផ្សាយក្នុងប្រទេសវៀតណាម នៅថ្ងៃចន្ទនេះ បានរាយការណ៍ថា ទីក្រុងហូជីមិញនឹងបន្តអនុវត្តវិធានការរឹតបន្តឹងដើម្បីទប់ស្កាត់ការឆ្លងរីករាលដាលរបស់វីរុសកូវីដ-១៩ ខណៈដែលរដ្ឋធានីហាណូយ និងខេត្តមួយចំនួនបានស្វះស្វែងរកការបន្ធូរបន្ថយការរឹតបន្តឹង ហើយអាជ្ញាធរអាកាសចរណ៍បានស្នើឱ្យបើកដំណើការជើងហោះហើរក្នុងស្រុកឡើងវិញ។
អាជ្ញាធរទីក្រុងហូជីមិញបានឱ្យដឹងថា ការបន្តអនុវត្តវិធានការរឹតបន្តឹងរហូតដល់ចុងខែកញ្ញានេះ គឺជាការចាំបាច់ដើម្បីញែកចង្កោមនៃការឆ្លង បង្កើនល្បឿនចាក់វ៉ាក់សាំងកូវីដ-១៩ និងបង្ការកុំឱ្យមន្ទីរពេទ្យជោរជន់ទៅដោយអ្នកជំងឺកូវីដ-១៩ នៅក្នុងទីក្រុងនេះដែលមានពលរដ្ឋរស់នៅ៩លាននាក់។
ថ្វីបើការចាក់វ៉ាក់សាំងកូវីដ-១៩ សម្រេចបានជាង១លានដូស ជារៀងរាល់ថ្ងៃនាមួយរយៈពេលចុងក្រោយនេះក៏ដោយ ក៏ប្រទេសវៀតណាមនៅតែជាប្រទេសមានអត្រាចាក់វ៉ាក់សាំងទាបជាងគេបំផុតមួយក្នុងតំបន់ ដោយបានចាក់វ៉ាក់សាំងឱ្យពលរដ្ឋបានតែ៥,២% ប៉ុណ្ណោះនៃចំនួនពលរដ្ឋ៩៨លាននាក់។
ប្រទេសវៀតណាមមានអ្នកឆ្លងវីរុសកូវីដ-១៩ ជាង ៦១០ ០០០នាក់ និងមានអ្នកស្លាប់ដោយសារវីរុសនេះចំនួន១៥ ០០០នាក់ ដែលភាគច្រើនគឺចាប់តាំងពីខែឧសភាមក ហើយ ៨០% នៃអ្នកស្លាប់ និងពាក់កណ្ដាលនៃចំនួនអ្នកឆ្លងសរុបគឺចេញពីទីក្រុងហូជីមិញ។
កន្លងមក វៀតណាមធ្លាប់ជាប្រទេសមួយទទួលបានជោគជ័យ ក្នុងការទប់ឱ្យករណីឆ្លងវីរុសកូវីដ-១៩ ស្ថិតនៅក្នុងកម្រិតមួយទាបតាមរយៈការធ្វើតេស្តទ្រង់ទ្រាយធំ និងការតាមដានរកអ្នកដែលបានប៉ះពាល់ជាមួយអ្នកឆ្លងបានលឿន, ការគ្រប់គ្រងការចេញចូលតាមព្រំដែន រួមនិងវិធានការចត្តាឡីស័ក។
ប៉ុន្តែការផ្ទុះឆ្លងថ្មីៗជាចង្កោមនៃវីរុសកូវីដ-១៩ ចាប់តាំងពីចុងខែមេសាមក បានបំផ្លាញជោគជ័យនេះ៕
អត្ថបទ និងរូបភាពដោយ៖ Puthi News
