ស្តាប់អត្ថបទជាសម្លេង
មន្ត្រីនាំពាក្យឲ្យក្រសួងការបរទេសចិន កាលពីថ្ងៃពុធ បាននិយាយថា ប្រទេសចិននឹងបន្តគាំទ្រការកសាងប្រទេសឡេីងវិញដោយសន្តិវិធីនៅអាហ្វហ្គានីស្ថាន និងផ្តល់ការអភិវឌ្ឍន៍ផ្នែកសេដ្ឋកិច្ច និងសង្គមដល់មិត្តស្មោះត្រង់របស់ខ្លួន បន្ទាប់ពីក្រុមតាលីបង់បានប្រកាសថា ពួកគេចង់បានទំនាក់ទំនងប្រកបដោយសន្តិភាពជាមួយប្រទេសដទៃ។
លោក ចាវ លីជាន (Zhao Lijian) មន្ត្រីនាំពាក្យឲ្យក្រសួងការបរទេសចិនបាននិយាយថា «ប្រទេសចិនតែងតែបន្តគោលនយោបាយមិត្តភាពនៅក្នុងទំនាក់ទំនងជាមួយពលរដ្ឋអាហ្វហ្គានីស្ថានទាំងអស់។ ហេីយចាប់តាំងពីអតីតកាល, ក្នុងពេលបច្ចុប្បន្ន ឬទៅអនាគត គោលនយោបាយនេះនឹងមិនផ្លាស់ប្តូរឡើយ»។
លោក ចាវ បានបន្ថែមថា «ប្រទេសចិននឹងបន្តគាំទ្រការកសាងប្រទេសឡេីងវិញដោយសន្តិវិធីនៅអាហ្វហ្គានីស្ថាន»។
គួរកត់សម្គាល់ថា កាលពីខែមុន ក្រុមមេដឹកនាំជាន់ខ្ពស់នៃក្រុមតាលីបង់បានជួបប្រជុំជាមួយរដ្ឋមន្ត្រីការបរទេសចិន លោក វ៉ាង យី (Wang Yi) នៅក្នុងទីក្រុងធានជីន (Tianjin) ភាគខាងកើតប្រទេសចិន។
ចិនដែលជាប្រទេសមួយនៃប្រទេសដែលមានព្រំដែនជាប់ជាមួយប្រទេសអាហ្វហ្គានីស្ថានដែរនោះ បានដកមន្ត្រីការទូតរបស់ខ្លួនចេញពីប្រទេសនេះក្នុងឆ្នាំ១៩៩៣ បន្ទាប់ពីប្រទេសនេះមានសង្គ្រាមស៊ីវិល។
រដ្ឋាភិបាលទីក្រុងប៉េកាំងមិនដែលបានបង្កើតទំនាក់ទំនងផ្លូវការជាមួយក្រុមតាលីបង់ទេ ក្រោយពីក្រុមនេះកាន់អំណាចកាលពីឆ្នាំ១៩៩៦៕
អត្ថបទ នឹងរូបភាព Puthinews
