ស្តាប់អត្ថបទជាសំឡេង
![](https://puthinews.com/wp-content/uploads/2021/10/photo_2021-10-25-11.42.03.jpeg)
បន្ទាយមានជ័យ៖ នគរបាលក្រុងប៉ោយប៉ែត បានចាប់ខ្លួនជនបរទេសចំនួន ៤នាក់ បញ្ជូនទៅកាន់តុលាការនៅរសៀលថ្ងៃ២៤ ខែតុលា ឆ្នាំ២០២១ ដើម្បីចាត់ការតាមច្បាប់ពីបទ ពង្រត់ និងបង្ខាំងមនុស្សចំនួន ៨នាក់ ដោយខុសច្បាប់ កាលពីថ្ងៃទី២៣ ខែតុលា ឆ្នាំ២០២១ នៅក្នុងកាស៊ីណូមួយកន្លែង នៅក្នុងបុរីសានស៊ានហូ ស្ថិតនៅក្នុងភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។ ក្នុងប្រតិបត្តិការបង្ក្រាបនេះ កម្លាំងបានរំដោះជនជាតិថៃ ៦នាក់ និងជនជាតិខ្មែរចំនួន ២នាក់។
![](https://puthinews.com/wp-content/uploads/2021/10/photo_2021-10-25-11.42.04.jpeg)
![](https://puthinews.com/wp-content/uploads/2021/10/photo_2021-10-25-11.42.04.jpeg)
លោកវរសេនីយ៍ឯក សៅ សារឿន អធិការនគរបាលក្រុងប៉ោយប៉ែត បានឱ្យដឹងថា ក្នុងប្រតិបត្តិការបង្ក្រាបការចាប់ជំម្រិតនេះដឹកនាំបញ្ជាផ្ទាល់ពីលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ និងមានការសម្របសម្រួលនីតិវិធីពី លោក កើត សុវណ្ណរ៉េត ព្រះរាជអាជ្ញារអមសាលាដំបូងខេត្ត បានដឹកនាំកម្លាំងសហការជាមួយ កម្លាំងការិយាល័យនគរបាលប្រឆាំងការជួញដូរមនុស្ស និងការពារអនីតិជន ចុះស្រាវជ្រាវ និងឈានដល់ការឆ្មក់ឃាត់ខ្លួនបរទេសចំនួន ៤នាក់ មានជនជាតិចិន ២នាក់ ជនជាតិបង់ក្លាដេស ២នាក់។
![](https://puthinews.com/wp-content/uploads/2021/10/photo_2021-10-25-11.42.05-1.jpeg)
![](https://puthinews.com/wp-content/uploads/2021/10/photo_2021-10-25-11.42.05-1.jpeg)
ជនសង្ស័យទាំង៤នាក់ ដែលពាក់ព័ន្ធករណីពង្រត់ និងបង្ខាំងមនុស្សដោយខុសច្បាប់នេះ មានឈ្មោះ ស៊ីន សៅស៊ុន ភេទប្រុស អាយុ៣៦ឆ្នាំ ជនជាតិចិន, ឈ្មោះ កៅ ឈុង ភេទប្រុស អាយុ៣៥ឆ្នាំ ជនជាតិចិន, ឈ្មោះ អ៊ីស្លាម អ៊ែលសារុល ភេទប្រុស អាយុ៣១ឆ្នាំ ជនជាតិបង់ក្លាដេស, ឈ្មោះ មៀ ហាប៊ីប ភេទប្រុស អាយុ២៧ឆ្នាំ ជនជាតិបង់ក្លាដេស។
![](https://puthinews.com/wp-content/uploads/2021/10/photo_2021-10-25-11.42.05.jpeg)
![](https://puthinews.com/wp-content/uploads/2021/10/photo_2021-10-25-11.42.05.jpeg)
ពាក់ព័ន្ធករណីនេះ លោកស្រី ឌី សជាតិ ស្នងការរងទទួលផែនការងារប្រឆាំងការជួញដូរមនុស្ស និងយ៉េនឌ័រ បានឱ្យដឹងថា យោងការបំភ្លឺរបស់ជនរងគ្រោះជនជាតិខ្មែរថា ពួកខ្លួនបានទៅដាក់ពាក្យសម្ភាសន៍ចូលធ្វើការកាស៊ីណូអនឡាញនៅរាជធានីភ្នំពេញ តែក្រុមជនសង្ស័យបាននាំពីភ្នំពេញមកកាស៊ីណូប៉ោយប៉ែត បន្ទាប់មេការជនជាតិចិន បានចាក់សោបង្ខាំង និងបានចាប់ដាក់ខ្នោះដៃ ឃុំឃាំងបង្អត់អាហារ ដោយប្រាប់ថា ពួកខ្លួនត្រូវបានគេលក់មកឱ្យខាងថៅកែកាស៊ីណូ បើចង់ចេញត្រូវបង់ប្រាក់ក្នុង១នាក់ ១.០០០ដុល្លារ តែបើគ្មានអ្នកមកលស់ទេត្រូវឃុំទុកទីនេះរយ:ពេល ៦ខែ។ ចំណែកជនជាតិថៃ ៦នាក់ ផ្សេងទៀត ក៏ត្រូវបានជនជាតិចិនខាងលើបង្ខាំងទុកផងដែរ ដោយខឹងជនជាតិថៃទាំងនោះមិនព្រមបង្កើតហ្វេសប៊ុក និងផេកក្លែងក្លាយដើម្បីបោកលុយជនជាតិថៃដូចគ្នា៕
![](https://puthinews.com/wp-content/uploads/2021/10/photo_2021-10-25-11.42.06-1.jpeg)
![](https://puthinews.com/wp-content/uploads/2021/10/photo_2021-10-25-11.42.06-1.jpeg)
![](https://puthinews.com/wp-content/uploads/2021/10/photo_2021-10-25-11.42.06.jpeg)
![](https://puthinews.com/wp-content/uploads/2021/10/photo_2021-10-25-11.42.06.jpeg)
អត្ថបទ និងរូបភាពដោយ៖ Puthinews
Join Telegram group: ឯកសារចំណេះដឹងសាធារណៈជន