ក្រុងធំៗនៅអាហ្វហ្គានីស្ថានធ្លាក់ក្នុងកណ្ដាប់ដៃក្រុមតាលីបង់ ក្នុងគ្រាដែលក្រុមនេះវាយប្រហាររុលទៅមុខយ៉ាងលឿន

ក្រុមតាលីបង់បានវាយដណ្ដើមបានទីរួមខេត្តចំនួនបីបន្ថែមទៀតនៅក្នុងប្រទេសអាហ្វហ្គានីស្ថាន  ក្នុងគ្រាដែលពួកគេបន្តវាយប្រហាររុលទៅមុខដើម្បីដណ្ដើមគ្រប់គ្រងទឹកដីនៅក្នុងប្រទេសមួយនេះ។ 

ក្រុមតាលីបង់បានវាយដណ្តើមកាន់កាប់ទីក្រុងឃុនឌុស (Kunduz) ស្ថិតនៅភាគខាងជើងប្រទេសដែលជាទីក្រុងដ៏សំខាន់មួយកាលពីថ្ងៃអាទិត្យព្រមទាំងទីក្រុងសាអ៊ីភុល (Sar-e-Pul) និងតាឡូកាន (Taloqan)។ 

ការវាយដណ្ដើមបាននេះមានន័យថា  ទីរួមខេត្តចំនួន ៥ ហើយដែលបានធ្លាក់ក្នុងកណ្ដាប់ដៃរបស់ក្រុមតាលីបង់ចាប់តាំងពីថ្ងៃសុក្រមក  ដោយទីក្រុងឃុនឌុស (Kunduz) គឺជាទីក្រុងដ៏សំខាន់បំផុតដែលពួកគេវាយដណ្ដើមបាននៅឆ្នាំនេះ។

ទីក្រុងឃុនឌុស (Kunduz)  ត្រូវបានតភ្ជាប់យ៉ាងល្អជាមួយតំបន់ផ្សេងៗទៀតរួមទាំងរដ្ឋធានីកាប៊ុល  (Kabul) ផង។ 

អំពើហិង្សាបានកើនឡើងពាសពេញប្រទេសអាហ្វហ្គានីស្ថានបន្ទាប់ពីអាមេរិក និងកងកម្លាំងអន្តរជាតិដទៃទៀតបានចាប់ផ្តើមដកកងទ័ពរបស់ពួកគេចេញពីប្រទេសអាហ្វហ្គានីស្ថាន  ក្រោយពីបានធ្វើប្រតិបត្តិការយោធាអស់រយៈពេល ២០ឆ្នាំនៅទីនេះ។ 

ក្រុមសកម្មប្រយុទ្ធតាលីបង់បានធ្វើការវាយប្រហាររុលទៅមុខយ៉ាងលឿនក្នុងរយៈពេលប៉ុន្មានសប្តាហ៍ចុងក្រោយនេះ។ បន្ទាប់ពីបានវាយដណ្ដើមបានដែនដីមួយភាគធំនៅតាមតំបន់ជនបទ  ឥឡូវនេះពួកគេកំពុងផ្តោតគោលដៅវាយដណ្ដើមទីប្រជុំជន  និងទីក្រុងសំខាន់ៗថែមទៀត។ 

ស្របពេលជាមួយគ្នានេះ  រដ្ឋាភិបាលអាហ្វហ្គានីស្ថានបានប្រកាសថា  កងកម្លាំងរបស់ខ្លួនកំពុងប្រយុទ្ធដើម្បីដណ្តើមយកតំបន់សំខាន់ៗ មកវិញ៕

អត្ថបទ និងរូបភាព Puthi News