ស្តាប់អត្ថបទជាសំឡេង
![](https://puthinews.com/wp-content/uploads/2021/10/photo_2021-10-09-16.29.57-1024x485.jpeg)
កំពង់ស្ពឺ៖ យុវជនម្នាក់ក្នុងចំណោមបក្ខពួក០៣នាក់ ត្រូវបានកម្លាំងនគរបាលចាប់ខ្លួនបញ្ជូនទៅកាន់អធិការដ្ឋាននគរបាលស្រុកបសេដ្ឋ ក្រោយធ្វើសកម្មភាពស្ទាក់ប្លន់យកម៉ូតូពីយុវជនម្នាក់ទៀតបានសម្រេច។ ករណីនេះបានកេីតឡើងនៅម៉ោង ២:៣០នាទីទៀបភ្លឺ ថ្ងៃទី០៩ ខែតុលា ឆ្នាំ២០២១ នៅលើកំណាត់ផ្លូវក្រាលកៅស៊ូ ក្នុងភូមិពពូល ឃុំស្វាយចចិប ស្រុកបសេដ្ឋ ខេត្តកំពង់ស្ពឺ។
យោងតាមរបាយការណ៍របស់នគរបាលស្រុកបសេដ្ឋ បញ្ជាក់ថា ជនសង្ស័យដែលឃាត់ខ្លួនបានមានឈ្មោះ សាន ម៉េងហ័ង អាយុ១៩ឆ្នាំ រស់នៅក្នុងភូមិសិរីអណ្តែត ឃុំនិទាន ស្រុកបសេដ្ឋ ខេត្តកំពង់ស្ពឺ និងបក្ខពួកពីរនាក់ផ្សេងទៀតដែលបានគេចខ្លួនបាត់មានឈ្មោះ ស៉ឹម រស្មី អាយុ២១ឆ្នាំ រស់នៅជាមួយជនសង្ស័យខាងលើ និងឈ្មោះ វិន អាយុ២៥ឆ្នាំ មិនស្គាល់ទីលំនៅ។
![](https://puthinews.com/wp-content/uploads/2021/10/photo_2021-10-09-16.29.58-768x1024.jpeg)
![](https://puthinews.com/wp-content/uploads/2021/10/photo_2021-10-09-16.29.58-768x1024.jpeg)
នៅចំពោះមុខសមត្ថកិច្ចជនសង្ស័យឈ្មោះ សាន ម៉េងហ័ង បានរៀបរាប់ឱ្យដឹងថា រូបគេ និងបក្ខពួកប្រដាប់ដោយកាំភ្លើងខ្លីមួយដើម បានជិះម៉ូតូមួយគ្រឿងម៉ាក់ប៊ីត ពណ៌ខៀវលាយស ពាក់ស្លាក់លេខ កំពង់ស្ពឺ ១R ៣៨១៥ ទៅចំណុចខាងលើរងចាំស្ទាក់ប្លន់។ គ្រានោះក៏បានធ្វើសកម្មភាពភ្ជង់ប្លន់យុវជនម្នាក់ដែលជិះម៉ូតូឌុបគ្នា យកបានម៉ូតូសង់ពណ៌ក្រហមមួយគ្រឿង សេរីឆ្នាំ២០២០ បិទតែមឡើងសេរីឆ្នាំ២០២១ ជិះគេចខ្លួន តែត្រូវកម្លាំងនគរបាលស្ទាក់ចាប់បាន។
![](https://puthinews.com/wp-content/uploads/2021/10/photo_2021-10-09-16.30.01-1-485x1024.jpeg)
![](https://puthinews.com/wp-content/uploads/2021/10/photo_2021-10-09-16.30.01-1-485x1024.jpeg)
របាយការណ៍បានបញ្ជាក់ថា ជនរងគ្រោះមានឈ្មោះ យឺន កាលីន ភេទប្រុស អាយុ១៧ឆ្នាំ រស់នៅភូមិត្នោត ឃុំទួលសាលា ស្រុកបសេដ្ឋ ជិះឌុបគ្នាជាមួយឈ្មោះ សុខ ម៉ែន ភេទប្រុស អាយុ២៣ឆ្នាំ រស់នៅភូមិស្វាយរំពារ ឃុំទួលសាលា ស្រុកបសេដ្ឋ។ ក្រោយស្ទាក់ចាប់កម្លាំងជំនាញបានឃាត់ខ្លួនយុវជនម្នាក់ដកហូតបានអាវុធខ្លីកែច្នៃមួយដើម និងមធ្យោបាយធ្វើសកម្មភាពម៉ូតូប៊ីតមួយគ្រឿង។ ក្នុងប្រតិបត្តិការស្ទាក់ចាប់នោះកម្លាំងនគរបាលស្រុកក៏បានដកហូតម៉ូតូជនរងគ្រោះម៉ាកហុងដា C១២៥ ពណ៌ក្រហមពាក់ស្លាកលេខ១កំពង់ស្ពឺID ៧១៧៩ ត្រឡប់មកវិញផងដែរ។
បច្ចុប្បន្នជនសង្ស័យកំពុងស្ថិតក្រោមការសាកសួរពីមន្ត្រីនគរបាលជំនាញនៃអធិការដ្ឋានស្រុកបសេដ្ឋ ដើម្បីកសាងសំណុំរឿងបន្តនីតិវិធី រីឯម៉ូតូជនរងគ្រោះក៏បានធ្វើប្រគល់ជូនជនរងគ្រោះវិញហើយដែរ។ ចំណែកមុខសញ្ញាជាបក្ខពួកសង្ស័យក្នុងអំពើប្លន់ សមត្ថកិច្ចកំពុងបើកប្រតិបត្តិការស៉ើបរុករកដើម្បីចាប់ខ្លួនយកទៅផ្តន្ទាទោសតាមផ្លូវច្បាប់៕
![](https://puthinews.com/wp-content/uploads/2021/10/photo_2021-10-09-16.30.01-1024x768.jpeg)
![](https://puthinews.com/wp-content/uploads/2021/10/photo_2021-10-09-16.30.01-1024x768.jpeg)
អត្ថបទ និងរូបភាពដោយ៖ Puthinews