សៀមរាប៖ កម្លាំងនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តសៀមរាប បានឃាត់ខ្លួន អ្នកជំនួញមានឥទ្ធិពលម្នាក់នៅក្នុងខេត្តសៀមរាប យកទៅសាកសួរ បន្ទាប់ពីបាញ់បង្អើលមេឃចំនួន ៤ គ្រាប់ដោយសារខឹងប្រពន្ធមិននៅផ្ទះ។
ហេតុការណ៍នេះកើតឡើង នៅវេលាម៉ោង ២២ និង ១៦ នាទី ថ្ងៃទី ៣០ ខែកក្កដា ឆ្នាំ ២០២២ នៅផ្ទះវីឡាមួយកន្លែង ស្ដិតក្នុងក្រុមទី៦ ភូមិត្រពាំងសេះ សង្កាត់គោកចក ក្រុងសៀមរាប។
![](https://puthinews.com/wp-content/uploads/2022/07/photo_2022-07-31-13.44.46.jpeg)
សមត្ថកិច្ចបានឱ្យដឹងថា ករណីបាញ់បោះសេរីនេះ បង្កឡើងជនសង្ស័យឈ្មោះ សុឹង ប៊ុនណា ភេទប្រុស អាយុ ៤៧ ឆ្នាំ មុខរបរ អ្នកជំនួញ នៅ ភូមិកើតហេតុខាងលើ។ ជនសង្ស័យបានបាញ់ឡើងលើ ចំនួន ៤ គ្រាប់ អាវុធម៉ាក K59 លេខ 2249 ផលិតនៅ ប្រទេសរុស្សុី។ ក្រោយពីបាញ់ហើយ ជនសង្ស័យបានចូលក្នុងបន្ទប់ដេកដោយកាន់កាំភ្លើងទៅជាមួយ។
![](https://puthinews.com/wp-content/uploads/2022/07/photo_2022-07-31-13.44.49.jpeg)
![](https://puthinews.com/wp-content/uploads/2022/07/photo_2022-07-31-13.44.49.jpeg)
សមត្ថកិច្ចបញ្ជាក់ថា កម្លាំងសមត្ថកិច្ចបានហ៊ុមព័ទ្ធខាងក្រៅតាំងពីយប់រហូត ដល់ម៉ោង ៧ និង ១០នាទី ថ្ងៃទី ៣១ ខែកក្កដា ឆ្នាំ២០២២ នេះ ទើបកម្លាំងព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តសៀមរាប ដែលដឹកនាំដោយលោក ថេង សំណាង ព្រះរាជអាជ្ញារងអមសាលាដំបូងខេត្តសៀមរាប បាននាំខ្លួនឈ្មោះ សុឹង ប៊ុនណា ភ្ជាប់ជាមួយអាវុធ K59 មួយដើម បង់ ២ គ្រាប់ ៦ គ្រាប់ យកទៅស្នងការខេត្តសៀមរាប ដើម្បីមានចំណាត់ការបន្ត។
![](https://puthinews.com/wp-content/uploads/2022/07/photo_2022-07-31-13.44.53.jpeg)
![](https://puthinews.com/wp-content/uploads/2022/07/photo_2022-07-31-13.44.53.jpeg)
សមត្ថកិច្ចបង្ហើបថា មូលហេតុនៃការបាញ់បោះសេរីនេះគឺដោយសារតែ លោក សុឹង ប៊ុនណា ខឹងប្រពន្ធមកផ្ទះយឺតម៉ោងកំណត់។ ទោះជាយ៉ាងណា មិនទាន់មានការបំភ្លឺពីភាគីខាងប្រពន្ធ របស់លោក សុឹង ប៊ុនណា នៅឡើយទេ។ បច្ចុប្បន្នកម្លាំងនគរបាលព្រហ្មទណ្ឌកម្រិតស្រាល នៃស្នងការដ្ឋានខេត្តសៀមរាបកំពុងសួរនាំ៕
![](https://puthinews.com/wp-content/uploads/2022/07/photo_2022-07-31-13.44.56.jpeg)
![](https://puthinews.com/wp-content/uploads/2022/07/photo_2022-07-31-13.44.56.jpeg)
ដោយ៖ ពុទ្ធិញ៉ូស៍
Telegram Channel: Puthi News
Youtube Channel: Puthi News
Puthinews Android app: Puthi News