លោក គីម ជុងអ៊ុន អំពាវនាវឱ្យយោធាខ្លួនពង្រឹងកម្លាំង «ដើម្បីកម្ទេចសត្រូវ» ខណៈការសាកល្បងនុយក្លេអ៊ែរកំពុងដំណើរការល្អ

មេដឹកនាំកូរ៉េខាងជើងលោក គីម ជុងអ៊ុន បានអំពាវនាវឱ្យយោធារបស់ប្រទេសខ្លួន “ពង្រឹងកម្លាំង និងសមត្ថភាព របស់ពួកគេក្នុងគ្រប់មធ្យោបាយ ដើម្បីកម្ទេចសត្រូវ” ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃសុក្រ ខណៈដែលរូបភាពផ្កាយរណបថ្មី បង្ហាញពីការបង្កើនការត្រៀមលក្ខណៈសម្រាប់ការសាកល្បងនុយក្លេអ៊ែរដែលអាចកើតមាន។ នេះបើយោងតាមការចុះផ្សាយរបស់សារព័ត៌មាន CNA នៅថ្ងៃទី២៩ មេសា។

ក្បួនដង្ហែយោធាដ៏ធំមួយដែលបានធ្វើឡើងកាលពីថ្ងៃចន្ទ ដែលជាការប្រារព្ធខួបលើកទី 90 នៃការបង្កើតកងទ័ព បានបង្ហាញនូវកាំជ្រួចមីស៊ីលចុងក្រោយបង្អស់ របស់កូរ៉េខាងជើងរួមទាំងមីស៊ីលផ្លោងអន្តរទ្វីប (ICBM) មីស៊ីល Hwasong-17 និងកាំជ្រួចល្បឿនលឿនជាងសំឡេងដែលត្រូវបានសាកល្បងនាពេលថ្មីៗនេះ។

ទីភ្នាក់ងារសារព័ត៌មានរដ្ឋ KCNA បានរាយការណ៍ថា ការបង្ហាញនេះបានបង្ហាញពី «ភាពទំនើប វីរភាព និងការអភិវឌ្ឍន៍រ៉ាឌីកាល់នៃកងកម្លាំងប្រដាប់អាវុធ នៃសាធារណរដ្ឋ និងឧត្តមភាពផ្នែកយោធា និងបច្ចេកវិទ្យារបស់ពួកគេ»។ កូរ៉េខាងជើងនិយាយថា ខ្លួនប្រឆាំងសង្គ្រាម ហើយអាវុធរបស់ខ្លួនគឺសម្រាប់ការពារខ្លួន ប៉ុន្តែនៅឯក្បួនដង្ហែកាលពីថ្ងៃចន្ទ លោក គីម បាននិយាយថា បេសកកម្មនៃកម្លាំងនុយក្លេអ៊ែររបស់ខ្លួនលើសពីការរារាំងសង្គ្រាម ដើម្បីរួមបញ្ចូលការការពារផលប្រយោជន៍ជាមូលដ្ឋានរបស់ប្រទេសផងដែរ។