កោះកុង៖ ក្រុមគ្រូពេទ្យផ្នែកសម្ភព និងរោគស្ត្រីនៃមន្ទីរពេទ្យបង្អែកខេត្តកោះកុង បានចុះជួយសង្គ្រោះស្ត្រីសម្រាលកូននៅលើទូក ក្នុងកំឡុងពេលធ្វើដំណើរនៅលើផ្ទៃមុទ្រ បានទាន់ពេលវេលា ដោយសុវត្ថិភាព ទាំងម្តាយ និងទារក។
ហេតុការណ៍នេះបានកើតឡើងនៅវេលាម៉ោង ៤:០០នាទីទាបភ្លឺនាថ្ងៃពុធ ទី៤ ខែកញ្ញា ឆ្នាំ២០២៤ ក្រុមគ្រូពេទ្យផ្នែកសម្ភព និងរោគស្ត្រីនៃមន្ទីរពេទ្យបង្អែកខេត្តកោះកុង បានចុះជួយសង្គ្រោះភ្លាមៗ ដល់ស្ត្រីជាម្តាយឈ្មោះ នឿន ស្រីនី អាយុ ២៧ឆ្នាំ អាស័យដ្ឋានបច្ចុប្បន្ននៅភូមិកោះស្រឡៅ (នៅលើកោះ) ឃុំកោះកាពិ ស្រុកកោះកុង ខេត្តកោះកុង។
បន្ទាប់ពីទទួលដំណឹងពីប្រជាពលរដ្ឋថា ស្ត្រីខាងលើឈឺពោះសម្រាលកូននៅលើទូកពេលធ្វើដំណើរតាមផ្លូវភ្លាម ក្រុមគ្រូពេទ្យជំនាញ បានចេញទៅសង្គ្រោះជាបន្ទាន់ ដើម្បីជួយសម្រួលដល់ការពន្យាពេលឈឺពោះសម្រាលកូននៅលើទូកលើផ្ទៃសមុទ្រ ក្នុងកំឡុងពេលកំពុងធ្វើដំណើរតាមទូក ពេលកំពុងមានព្យុះ និងភ្លៀងរលឹមស្រិចៗ។
បើតាម ក្រុមគ្រូពេទ្យផ្នែកសម្ភព និងរោគស្ត្រីនៃមន្ទីរពេទ្យបង្អែកខេត្តកោះកុង បានបញ្ជាក់ថា ការចុះជួយសង្គ្រោះនេះ គឺក្រុមគ្រូពេទ្យទទួលសង្គ្រោះយកមកមន្ទីរពេទ្យបង្អែកខេត្តកោះកុងដើម្បីទទួលសេវាសម្រាលកូន ដោយសារស្ត្រីជាម្តាយឈឺពោះត្រៀមសម្រាល ហើយថែមទាំងបានជួយសង្គ្រោះស្ត្រីខាងលើដោយសុវត្ថិភាពទាំងម្តាយ និងកូន (កូនទី៣ ភេទស្រី ទម្ងន់ ៣,២ គ.ក) និងបានបញ្ជូនតាមរយៈរថយន្តសង្គ្រោះមកបន្តការថែទាំ ព្យាបាលនៅផ្នែកសម្ភព និងរោគស្ត្រី នៅមន្ទីពេទ្យបង្អែកខេត្តកោះកុង ដោយជោគជ័យ និងមានសុវត្ថិភាពបំផុត៕
ដោយ៖ Puthinews
Youtube Channel: Puthi News
Telegram Channel: Puthi News
Puthinews Android app: Puthi New
