កណ្តាល៖ នៅថ្ងៃទី១៤ ខែកក្កដា ឆ្នាំ២០២៣ វេលាម៉ោង ១៤៖៣០នាទីរសៀល មានករណីមនុស្សបាត់ខ្លួន (លង់ទឹក) នៅចំណុចកន្លែងកំសាន្ត ក្បាលកោះខ្សាច់ទន្លា ស្ថិតក្នុងភូមិក្បាលកោះលិច ឃុំកោះខ្សាច់ទន្លា ស្រុកស្អាង។ ក្រុមការងារលេខាធិការដ្ឋានគ្រប់គ្រងគ្រោះហន្តរាយខេត្ត រដ្ឋបាលស្រុកស្អាង មេឃុំកោះខ្សាច់ទន្លា លោកមេភូមិពាក់ព័ន្ធ ចុះពិនិត្យទីតាំងកើតហេតុ បានបញ្ជាក់ថាចំណុចកន្លែងកំសាន្តក្បាលកោះខ្សាច់ទន្លា ស្ថិតនៅភូមិក្បាលកោះលិច ឃុំកោះខ្សាច់ទន្លា ស្រុកស្អាង ខេត្តកណ្ដាល មានក្មេងសិស្សសាលាមួយចំនួន (សុទ្ធតែក្មេងប្រុស) អាយុប្រហែល១៨-១៩ឆ្នាំ បានមកកំសាន្តនៅចំណុចកើតហេតុ ដោយនាំគ្នាចុះងូតទឹកកំសាន្តសប្បាយ។ ខណៈពេលក្រុម យុវជនសិស្សសាលាខាងលើ កំពុងងូតទឹកលេង ស្រាប់តែមាន ភ្លៀងធ្លាក់ លាយឡំនឹងខ្យល់កន្ត្រាក់យ៉ាងខ្លាំង បានធ្វើឲ្យយុវជនសិស្សសាលាចំនួន ៣រូប ត្រូវបានខ្យល់បក់ទៅកាន់កន្លែងដែលមានទឹកកាន់តែជ្រៅ ពេលនោះមានយុវជនជាសិស្សពីរនាក់ បានតោងពោងជាប់ និងម្នាក់ទៀត បានធ្លាក់ចូលទៅក្នុងទឹកដែលមានជម្រៅជ្រៅជាមុន និងបានលិចបាត់ខ្លួននៅឡើយ រកពុំទាន់ឃើញ។
ចំណែកយុវជនពីរនាក់ទៀតបានព្យាយាមតោងពោងជាប់ និងបានទូកដរចម្លងដែលនៅជិតនោះជួយសង្គ្រោះបានមិនមានប៉ះពាល់ដល់អាយុជីវិតឡើយ ។
យុវជនកំពុងបាត់ខ្លួនមានឈ្មោះ ថេង បញ្ញា ថ្ងៃខែឆ្នាំកំណើត ១៣.០៦.២០០៨ ជនជាតិខ្មែរ មានទីលំនៅភូមិព្រែកខ្មែរ ឃុំស្អាងភ្នំ ស្រុកស្អាង ជាសិស្សថ្នាក់ទី ៨ នៃវិទ្យាល័យហ៊ុនសែនស្អាង។
អាជ្ញាធរពាក់ព័ន្ធ សហការជាមួយក្រុមជំនាញ កំពុងព្យាយាមស្វែងរកជនបាត់ខ្លួនដោយប្រើប្រាស់កម្លាំង និងទូកចំនួន ០៣គ្រឿង ដើម្បីស្វែងរកសាកសព និងបានស្វែងរកឃើញនៅវេលាម៉ោង ១៦៖០០នាទីរសៀល នៅត្រង់ចំណុចដែលបានលិចបាត់ និងបានស្រង់សាកសព យកមកប្រគល់ជូនអាណាព្យាបាល យកទៅធ្វើបុណ្យតាមប្រពៃណី។
ដោយ៖ Puthinews
Youtube Channel: Puthi News
Telegram Channel: Puthi News
Puthinews Android app: Puthi News
