ម៉ូស្គូ៖ អភិបាលក្រុងក្រុងមូស្គូបានអះអាងថា ប្រព័ន្ធការពារដែនអាកាសរុស្ស៊ីបានបាញ់ទម្លាក់ដ្រូនប្រដាប់អាវុធចំនួនពីរគ្រឿង ដែលហោះសំដៅទៅក្រុងមូស្គូ។ នេះបើតាមការរាយការណ៍របស់ទីភ្នាក់ងារសារព័ត៌មានផ្សេងៗ។
លោកអភិបាល Sergei Sobyanin បាននិយាយលើតេឡេក្រាម នៅព្រឹកថ្ងៃពុធនេះថា ដ្រូនមួយគ្រឿង ត្រូវបានបាញ់ទម្លាក់នៅតំបន់ Domodedovo នៅជាយក្រុងភាគខាងត្បូង ខណៈដ្រូនមួយទៀត ត្រូវបានបាញ់ទម្លាក់នៅតំបន់ផ្លូវហាយវេ Minsk នាភាគខាងលិចក្រុង។
លោក Sobyanin មិនបានហៅឈ្មោះថាអ្នកណាស្ថិតនៅពីក្រោយការវាយប្រហារនោះទេ ដោយថ្លែងថា «នៅពេលនេះ មិនមានព័ត៌មានអំពីជនរងគ្រោះដោយសារតែធ្លាក់បំណែកដ្រូននៅឡើយទេ»។
ចំណែកទីភ្នាក់ងារព័ត៌មានរដ្ឋរុស្ស៊ី បានរាយការណ៍អំពីការប៉ុនប៉ងវាយប្រហារដោយដ្រូននេះ ដោយស្រង់សម្ដីការលើកឡើងពីក្រសួងការពារជាតិរុស្ស៊ី ដែលនិយាយថា ដ្រូនរបស់អ៊ុយក្រែនត្រូវបានបំផ្លាញក្នុងការប៉ុនប៉ងវាយប្រហារទីក្រុងមូស្គូ។
គួរបញ្ជាក់ថា នេះគឺជាលើកទី៣ ដែលក្រុងមូស្គូរងការប៉ុនប៉ងវាយប្រហារដោយដ្រូន ក្នុងសប្តាហ៍នេះ។ យោងតាមមន្ត្រីរុស្ស៊ីបានឱ្យដឹងថា រុស្ស៊ីបានបាញ់ទម្លាក់ដ្រូនអ៊ុយក្រែនកាលពីថ្ងៃអាទិត្យនៅក្នុងសង្កាត់ Podolsky នៅជាយក្រុងមូស្គូ និងកាលពីថ្ងៃចន្ទនៅជិតតំបន់ Kaluga ។
ក្រៅពីនេះ ក្រសួងការពារជាតិរុស្ស៊ីបាននិយាយកាលពីសប្តាហ៍មុនថា ខ្លួនបានបាញ់ទម្លាក់ដ្រូនចំនួនប្រាំពីរ គ្រឿងនៅជិតតំបន់ Kaluga ដែលមានចម្ងាយតិចជាង ២០០ គីឡូម៉ែត្រ ភាគនិរតីនៃទីក្រុងមូស្គូ។
ថ្មីៗនេះ ទីក្រុងមូស្គូបានក្លាយជាគោលដៅវាយប្រហារដោយដ្រូន បាញ់ចេញពីអ៊ុយក្រែន។ កាលពីចុងខែកក្កដា ប្រធានាធិបតីអ៊ុយក្រែនលោក វ្ល៉ូឌីមៀរ ហ្សេលេនស្គី បានព្រមានថា «សង្រ្គាម» កំពុងចូលទៅដល់ប្រទេសរុស្ស៊ីហើយ ដោយទីកន្លែងផ្សេងៗ និងមូលដ្ឋានយោធារុស្ស៊ី បានក្លាយជាគោលដៅ។
យ៉ាងណាមិញ ការវាយប្រហារដោយដ្រូនលើរុស្ស៊ី កើតឡើងខណៈរុស្ស៊ីបន្តការវាយប្រហារលើហេដ្ឋារចចនាសម្ព័ន្ធស៊ីវិលនៅអ៊ុយក្រែនជាញឹកញាប់ ដោយសម្លាប់ជនស៊ីវិលជាច្រើននាក់។ បើតាមលោក ហ្សេលេនស្គី កាលពីថ្ងៃអង្គារ ការវាយប្រហារដោយមីស៊ីលរបស់រុស្ស៊ីលើអគារលំនៅដ្ឋាន សណ្ឋាគារ ហាងកាហ្វេ ហាងទំនិញ និងអគាររដ្ឋបាលផ្សេងៗ បានសម្លាប់មនុស្សយ៉ាងហោចណាស់ ៩ នាក់ និងជាង ៨០ នាក់រងរបួស៕
ដោយ៖ Puthinews
Youtube Channel: Puthi News
Telegram Channel: Puthi News
Puthinews Android app: Puthi News