តេហេរ៉ង់៖ ប្រធានាធិបតីចិន លោក អ៉ីប្រាហ៉ីម រ៉ៃស៉ី (Ebrahim Raisi) នឹងបំពេញដំណើរទស្សនកិច្ចរយៈពេល៣ថ្ងៃ នៅកាន់ប្រទេសចិន ក្រោមគោលដៅពង្រឹងកិច្ចសហប្រតិបត្តិការសេដ្ឋកិច្ចឱ្យកាន់តែរឹងមាំថែមទៀត រវាងប្រទេសទាំងពីរ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអាទិត្យ ទី១២ ខែកុម្ភៈ ឆ្នាំ២០២៣។
ប្រព័ន្ធផ្សព្វផ្សាយរដ្ឋអ៉ីរ៉ង់ IRNA បានរាយការណ៍ថា លោក រ៉ៃស៉ី នឹងចេញដំណើរទៅកាន់ទីក្រុងប៉េកាំង នាវេលាល្ងាចថ្ងៃចន្ទដើមសប្តាហ៍ក្រោយនេះ តបតាមការអញ្ជើញជាផ្លូវការរបស់ប្រធានាធិបតីចិន លោក ស៉ី ជិនពីង។ បើតាម IRNA កំលុងការបំពេញទស្សនកិច្ចនេះ លោកប្រធានាធិបតីអ៉ីរ៉ង់ នឹងជួបពិភាក្សាក្នុងលក្ខណៈឯកជនជាមួយលោក ស៉ី ហើយប្រតិភូនៃប្រទេសទាំងពីរ នឹងត្រូវចុះហត្ថលេខាលើឯកសារផ្សេងៗ ស្តីពីការពង្រឹងកិច្ចសហប្រតិបត្តិការ។
![](https://puthinews.com/wp-content/uploads/2023/02/photo_2023-02-15-09.29.06-1024x640.jpeg)
គួរបញ្ជាក់ថា ប្រធានាធិបតីនៃប្រទេសទាំងពីរ បានជួបគ្នាជាលើកដំបូងកាលពីខែកញ្ញា ឆ្នាំ២០២២ នៅប្រទេសអ៊ូសបេគីស្ថាន កំលុងកិច្ចប្រជុំកំពូល នៃអង្គការកិច្ចសហប្រតិបត្តិការសៀងហៃ (SCO) ហើយពេលនោះលោកប្រធានាធិបតីអ៉ីរ៉ង់ បានអំពាវនាវឱ្យមានការពង្រីកទំនាក់ទំនងថែមទៀត។ កាលពីឆ្នាំ២០២១ ប្រទេសទាំងពីបានចុះកិច្ចព្រមព្រៀងកិច្ចសហប្រតិបត្តិការយុទ្ធសាស្រ្តរយៈពេល២៥ឆ្នាំ ដែលរួមមានទាំងផ្នែកនយោបាយ និងសេដ្ឋកិច្ច៕
ដោយ៖ Puthinews
Telegram Channel: Puthi News
Puthinews Android app: Puthi News
Youtube Channel: Puthi News