កៀវ៖ រដ្ឋមន្ត្រីការបរទេសអ៊ុយក្រែន លោក ឌីមីត្រូ គូលេបា បានព្រមានអ៊ីរ៉ង់អំពី “ផលវិបាកដ៏ធ្ងន់ធ្ងរ” នៃការផ្គត់ផ្គង់សព្វាអាវុធដល់ប្រទេសរុស្ស៊ី។ នេះបើតាមការចេញផ្សាយដោយទីភ្នាក់ងារសារព័ត៌មាន Ukrinform ដែលគ្រប់គ្រងដោយរដ្ឋាភិបាលអ៊ុយក្រែន។
លោក គូលេបា បាននិយាយយ៉ាងដូច្នេះថា សញ្ញារបស់យើងចំពោះពួកគេ (ភាគីអ៊ីរ៉ង់) គឺច្បាស់ណាស់៖ ទីមួយ អ្នកគួរតែឈប់ ឬអ្នកចង់ប្រឈមមុខនឹងផលវិបាកដ៏ធ្ងន់ធ្ងរបំផុត។
ទីពីរ មិនថាអ្នកទទួលបានផលប្រយោជន៍អ្វីពីកិច្ចសហប្រតិបត្តិការជាមួយរុស្ស៊ី ក្នុងការផ្គត់ផ្គង់យន្តហោះដ្រូន ឬអាវុធផ្សេងទៀតនោះទេ ផលវិបាកដ៏ធ្ងន់ធ្ងរជាអវិជ្ជមានសម្រាប់អ្នក នឹងមានលើសពីអត្ថប្រយោជន៍ណាមួយដែលអ៊ីរ៉ង់ទទួលបានពីរុស្ស៊ី។
ប្រមុខការទូតអ៊ុយក្រែនរូបនេះបន្ថែមថា អ៊ុយក្រែនកំពុងតាមដានយ៉ាងដិតដល់នូវ “រាល់ជំហាន” របស់អ៊ីរ៉ង់ នៅក្នុងបញ្ហានៃកិច្ចសហប្រតិបត្តិការបច្ចេកទេសយោធាជាមួយរុស្ស៊ី។ សូមរម្លឹកថា កាលពីខែតុលា ក្រសួងការបរទេសអ៊ុយក្រែនបានចោទអ៊ីរ៉ង់ថា បានបញ្ជូនយន្តហោះចម្បាំងទៅរុស្ស៊ី ដើម្បីប្រើក្នុងជម្លោះរុស្ស៊ី និងអ៊ុយក្រែន។
ចំណែកកាលពីខែវិច្ឆិកា រដ្ឋមន្ត្រីការបរទេសអ៊ីរ៉ង់ លោក Hossein Amir-Abdollahian បាននិយាយថា អ៊ីរ៉ង់បានផ្តល់យន្តហោះដ្រូនក្នុងចំនួនមានកំណត់ដល់ប្រទេសរុស្ស៊ីជាច្រើនខែ មុនពេលចាប់ផ្តើមជម្លោះរុស្ស៊ី និងអ៊ុយក្រែន។ នេះបើតាមការចេញផ្សាយពីទីភ្នាក់ងារសារព័ត៌មានផ្លូវការរបស់អ៊ីរ៉ង់ IRNA ៕
ដោយ៖ Puthinews
Telegram Channel: Puthi News
Puthinews Android app: Puthi News
Youtube Channel: Puthi News
