ប្រជាពលរដ្ឋ រស់នៅក្នុង ក្រុងបាត់ដំបងស្នើសុំឱ្យអាជ្ញាធរ ខេត្តពន្លឿនក្នុងការជួសជុលផ្លូវដែលខូចខាត ជា ច្រើន កន្លែង ដែលធ្វើឱ្យប៉ះពាល់ដល់ការធ្វើដំណើររបស់ពលរដ្ឋនៅក្នុងរដូវភ្លៀងធ្លាក់។
ពលរដ្ឋម្នាក់ដែលសូម មិនបញ្ចេញឈ្មោះ បានលើកឡើងថា ផ្លូវក្នុងក្រុងមានការខូចខាតច្រើន។ អាជ្ញាធរបានជួសជុលខ្លះហើយ ប៉ន្តែ នៅចំណុចខ្លះទៀតមិនទាន់ ធ្វើនៅឡើយ ដោយសារ ផ្លូវមានសំបុកមាន់ច្រើនពិបាកធ្វើដំណើរ។ ផ្លូវដែលលំបាកនោះ មានដូចជា ចំណុចភ្លើងស្តុបច្រមុះជ្រូក ទៅសាលាឌូវី ផ្លូវភ្លើងស្តុបទៅសួន និងផ្លូវមុខភូមិភាគ៥ជាដើម។
ពលរដ្ឋបានលើកឡើងថាផ្លូវកន្លែងខ្លះយឺតយ៉ាវក្នុងការជួសជុល គឺឈូសឆាយហើយ ទុកចោលមិនទាន់បន្តចាក់កៅស៊ូឡើងវិញ ដែលធ្វើឱ្យហុយ ប៉ះពាល់ដល់អ្នកធ្វើដំណើរ ដូចជាផ្លូវទៅវាលស្រែ១០០ និងផ្លូវមុខវត្តពោធិ៍វង្សជាដើម ។
លោក ផេង រ៉ា អនុប្រធានមន្ទីរសាធារណៈការនិងដឹកជញ្ជូន មានប្រសាសន៍នៅក្នុងកម្មវិធីសន្ទនាមតិ នាថ្ងៃទី២៨ខែមេសា២០២២ កន្លងមកថា បច្ចុប្បន្ននេះមន្ទីរបាន ដាក់កម្លាំងពីរក្រុម ដើម្បីធ្វើការលុបសំបុកមាន់ក្នុងក្រុង ដោយលោកអះអាងថាប៉ុន្មានថ្ងៃទៀត ផ្លូវសំបុក មាន់នឹងអស់ មិនឱ្យមាននោះទេ។
ឆ្លើយតបនឹងការលើកឡើងនេះ លោក សុង សឿង មន្រ្តីទទួលបន្ទុកសាធារណៈការក្រុងបាត់ដំបង បានមានប្រសាសន៍នៅក្នុងកម្មវិធីសន្ទនាមតិ ដែរថា ដោយសារអា កាស ធាតុ ផ្លូវថ្នល់ក្នុងក្រុងបាត់ដំបងបានរងការខូចខាតជាច្រើនកន្លែងមិនអាចធ្វើលឿនបានទេ ព្រោះកម្លាំងមានចំនួនតិច ហើយកញ្ចប់ថវិកាមានកំណត់ផងដែរ។
លោកបន្ថែមថា ផ្លូវខាងលើ បានឈូសឆាយធ្វើគ្រឹះអស់ហើយ នៅតែចាក់កៅស៊ូប៉ុណ្ណោះ តែវាទាមទាពេលវេលា មិនអាចធ្វើលឿនបានទេ។
ដោយ៖ Puthinews
Telegram Channel: Puthinews
Youtube Channel: Puthi News
Puthinews Android app: Puthi News