បន្ទាយមានជ័យ៖ អំពើហិង្សា ដោយចេតនានេះបានកើតឡើង កាលពីថ្ងៃទី០៧ ខែឧសភា ស្ថិតនៅភូមិ អូរបីជាន់ ស្រុកអូរជ្រៅ ខេត្តបន្ទាយមានជ័យ។ នៅថ្ងៃទី០៨ ខែឧសភា សមត្ថកិច្ច បានប្រាប់សារព័ត៌មានក្នុងស្រុកថា ជនរងគ្រោះឈ្មោះ ឃាង វណ្ណា អាយុ៥៥ឆ្នាំ ភេទប្រុស ជាអ្នកឃ្វាលក្របី។ ឃាតករមានឈ្មោះ រ៉ា ទឹមច័ន្ទពិសី អាយុ៤២ឆ្នាំ ភេទប្រុស មានឋានន្តរស័ក្តិ វរសេនីយ៍ទោ ជានាយរងការិយាល័យ កិច្ចការផ្ទៃក្នុងក្រសួងមហាផ្ទៃ។
លោកវរសេនីយ៍ឯក អ៊ឹម សុភារ៉ា អធិការនគរបាលស្រុកអូរជ្រៅ បានប្រាប់សារព័ត៌មានក្នុងស្រុកថា ការបាញ់ប្រហារនេះ បានកើតឡើងដោយសារតែក្របីរបស់ជនរងគ្រោះ បានចូលស៊ីស្មៅនៅក្នុងដីរបស់នគរបាល។ ស្ថានការណ៍ កាន់តែតានតឹងរហូតឈានដល់ការបាញ់សម្លាប់ អ្នកឃ្វាលគោមួយគ្រាប់ចំ កំភួនជើងខាងឆ្វេង។
សមត្ថកិច្ចបានបន្តថា ក្រោយបាញ់ជនរងគ្រោះឃាតករ ទឹម ច័ន្ទពិសី បានរត់គេចខ្លួនពីកន្លែងកើតហេតុ។
ភ្លាមៗនោះ អ្នកជិតខាង និងសមត្ថកិច្ចបាននាំជនរងគ្រោះទៅកាន់មណ្ឌលសុខភាពអូរបីជាន់ ដើម្បីព្យាបាល មុននឹងបញ្ជូនបន្តទៅមន្ទីរពេទ្យមិត្តភាពកម្ពុជា-ជប៉ុន។
កម្លាំងនគរបាលព្រហ្មទណ្ឌខេត្តស្រុក និងឃុំបានកំពុងស្រាវជ្រាវរកជនសង្ស័យ ដើម្បីកសាង សំណុំរឿងតាមនីតិវិធីច្បាប់៕
ដោយ៖ Puthinews
Telegram Channel: Puthinews
Youtube Channel: Puthi News
Puthinews Android app: Puthi News
