កៀវ៖ លោក មីកខែល ប៉ូដូឡាក់ ទីប្រឹក្សាប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានប្រាប់ប្រព័ន្ធផ្សព្វផ្សាយអាល្លឺម៉ង់ នៅថ្ងៃចន្ទទី២៦ ខែកញ្ញាថា អ៊ុយក្រែននឹងមិនប្រកាសពីការចល័តកងទ័ពបន្ថែមទៀត ដើម្បីជាការឆ្លើយតបទៅនឹងការធ្វើប្រជាមតិ ស្តីពីការចូលរួមជាមួយរុស្ស៊ី ដែលកំពុងដំណើរការនៅភាគខាងកើតនៃប្រទេសអ៊ុយក្រែននោះទេ។
លោក ប៉ូដូឡាក់ បានបញ្ជាក់យ៉ាងដូច្នេះថា យើងបានបង្កើតទុនបំរុងរួចហើយ តាមរយៈប្រព័ន្ធការពារទឹកដី ហើយនឹងប្រើប្រាស់ទុនបំរុងទាំងនេះយ៉ាងសកម្ម។ យើងមិនគួរប្រកាសពីការចល័តកងទ័ពបន្ថែមនៅថ្ងៃនេះទេ… យើងមានអ្វីៗគ្រប់យ៉ាង ហើយយើងត្រៀមខ្លួនប្រឈមមុខនឹងទាហានរុស្ស៊ីបន្ថែមទៀត។
ជាមួយគ្នានេះ លោក ប៉ូដូឡាក់ បានអះអាងថា អ៊ុយក្រែនកំពុងបាត់បង់ចំនួនទាហានតិចជាងរុស្ស៊ីឆ្ងាយណាស់។ ចំណែករដ្ឋមន្ត្រីការពារជាតិរុស្ស៊ី លោក សឺហ្គេ ស៊យហ្គូ បានប្រកាសកាលពីប៉ុន្មានថ្ងៃមុននេះថា ខណៈដែលរុស្ស៊ីបានបាត់បង់កងទ័ពចំនួន ៦.០០០នាក់ ចាប់តាំងពីការចាប់ផ្តើមសង្គ្រាមក្នុងខែកុម្ភៈមក ខណៈដែលអ៊ុយក្រែនក៏បានបាត់បង់កងទ័ពប្រហែល ៦១.០០០នាក់ដែរ។
ដោយឡែកយោងតាមភាគីអ៊ុយក្រែន ទាហានរុស្ស៊ីប្រមាណ ៥៥.០០០នាក់ត្រូវបានសម្លាប់។ រីឯទីភ្នាក់ងារ CIA បានបញ្ជាក់ថា នៅចុងខែកក្កដា រុស្ស៊ីបានបាត់បង់ទាហានជាង ១៥,០០០នាក់នៅអ៊ុយក្រែន ខណៈដែលចារកម្មអង់គ្លេសក៏បានរាយការណ៍ដែរថា រុស្ស៊ីបានបាត់បង់ទាហានចំនួន ២០,០០០នាក់កាលពីខែមិថុនា៕
ដោយ៖ ពុទ្ធិញូវ
Telegram Channel: Puthi News
Puthinews Android app: Puthi News
Youtube Channel: Puthi News