29 C
Phnom Penh
Thursday, June 23, 2022

អភិបាលខេត្តរតនគិរី បង្ហាញពីសក្ដានុពលធំៗ៣ ដែលជាចំណែកយ៉ាងសំខាន់ ក្នុងការអភិវឌ្ឍខេត្ត

រតនគិរី៖ លោក ញ៉ែម សំអឿន អភិបាលខេត្តរតនគិរី បានបង្ហាញពីសក្ដានុពលរបស់ខេត្តរតនគិរីដែលមាន៣ធំៗ ដល់ទីភ្នាក់ងារស្វីសសម្រាប់ការអភិវឌ្ឍជំនាញ និងកិច្ចសហប្រតិបត្តិការ (SDC) ដែលក្នុងនោះមាន វិស័យអេកូទេសចរណ៍ វិស័យកសិ-ឧស្សាហកម្ម និងវិស័យរ៉ែ ដែលជាចំណែកយ៉ាងសំខាន់ ក្នុងការអភិវឌ្ឍខេត្តរតនគិរី។

ការបង្ហាញពីសក្ដានុពលរបស់ខេត្តរតនគិរីនេះធ្វើឡើងក្នុងឱកាសជំនួបរបស់ លោក ញ៉ែម សំអឿនជាមួយគណៈប្រតិភូទីភ្នាក់ងារស្វីសសម្រាប់ការអភិវឌ្ឍជំនាញ និងកិច្ចសហប្រតិបត្តិការ (SDC) នៅសាលាខេត្ត នាព្រឹកថ្ងៃទី២៦ ខែមករា ឆ្នាំ២០២២។

នាឱកាសនេះ លោកស្រី Nadia Ottiger អនុប្រធាននៃទីភ្នាក់ងារស្វីស SDC បាន ស្នើសុំការតម្រង់ទិស និងភ្ជាប់ទំនាក់ទំនងការទូត សំដៅឱ្យការអនុវត្តកម្មវិធីអភិវឌ្ឍន៍ជំនាញ SDP ទទួលបានជោគជ័យនៅខេត្តរតនគិរី។

លោកស្រីបន្ថែមថា កម្មវិធីអភិវឌ្ឍន៍ជំនាញ SDP គឺមានគោលដៅសម្រាប់ជួយដល់យុវជន យុវតី ដែលជួបការលំបាក និងកម្មករជំនាញទាបនៅក្នុងខេត្តចំនួនប្រាំ នៃប្រទេសកម្ពុជា (ព្រះវិហារ ស្ទឹងត្រែង ក្រចេះ មណ្ឌលគិរី និងរតនគិរី) ដើម្បីឱ្យពួកគេទទួលបានការងារសមរម្យ និងប្រាក់ចំណូលកើនឡើង ហើយកម្មវិធីនេះ មានគោលបំណងសំខាន់ចំនួនពីររួមមាន
ទី១ គាំទ្រដល់ប្រព័ន្ធអប់រំ និងបណ្តុះបណ្តាលវិជ្ជាជីវៈបច្ចេកទេសកម្ពុជា (TVET) ឱ្យកាន់តែមានប្រសិទ្ធភាពក្នុងខេត្តគោលដៅ និងទី២ លើកកម្ពស់ការងារ និងប្រាក់ចំណូលរបស់យុវជន និងយុវនារី ដែលជួបការលំបាក និងកម្មករជំនាញទាប តាមរយៈបច្ចេកទេស ជំនាញ ជំនាញទន់ និងជំនាញសហគ្រិនភាព។

បន្ថែមពីនោះលោកស្រី ក៏បានថ្លែងអំណរគុណដល់ភាគីពាក់ព័ន្ធទាំងអស់ ដែលបានសហការគ្នាយ៉ាងល្អ ដើម្បីធ្វើឱ្យគម្រោងមួយនេះដំណើរការបានយ៉ាងល្អ ដោយលោកស្រីសង្កេតឃើញថា នៅមជ្ឈមណ្ឌលបណ្ដុះបណ្ដាលវិជ្ជាជីវៈខេត្ត មានសិស្សស្រីបានមកចូលរៀនច្រើន ព្រមទាំងមានសិស្សជាជនជាតិដើមភាគតិច និងសិស្សានុសិស្សដែលក្រីក្រ និងមានជីវភាពលំបាកៗ សុទ្ធតែបានមកចូលរៀនដោយស្មើភាពគ្នា និងទទួលបានចំណេះជំនាញដូចៗគ្នា។

ទន្ទឹមនឹងនេះដែរលោក ញ៉ែម សំអឿន បាន ថ្លែងអំណរគុណយ៉ាងជ្រាលជ្រៅចំពោះ SDC ដែលបានឧបត្ថម្ភ គាំទ្រដល់មជ្ឈមណ្ឌលបណ្ដុះបណ្ដាលវិជ្ជាជីវៈខេត្តរតនគិរី ដើម្បីបណ្ដុះបណ្ដាលធនធានមនុស្ស អភិវឌ្ឍជំនាញ និងបង្កើតចំណូលដល់ប្រជាពលរដ្ឋ។

លោកអភិបាលខេត្ត ក៏បានសំណូមពរដល់ ទីភ្នាក់ងារស្វីស SDC បន្ដជួយឧបត្ថម្ភគាំទ្រ ដល់មជ្ឈមណ្ឌលបណ្ដុះបណ្ដាល វិជ្ជាជីវៈខេត្ត នូវសម្ភារបច្ចេកទេសនានា សម្រាប់ប្រើប្រាស់ក្នុងការបង្រៀន ព្រមទាំងជួយបណ្ដុះបណ្ដាលនូវជំនាញថ្មីៗបន្ថែមទៀត លើជំនាញអគ្គិសនី សំណង់ ជំនាញជួសជុលម៉ាស៊ីនត្រជាក់ និងបរិក្ខារនានា និងជំនាញជួសជុលរថយន្ដជាដើម៕

អត្ថបទ និងរូបភាពដោយ៖ Puthinews

Telegram group: Puthinews

YOUTUBE | Puthinews

WEBSITE | Puthinews

- Advertisement -spot_imgspot_img

អានបន្ត