ខេត្តបន្ទាយមានជ័យ ៖ សម្តេចតេជោ ហ៊ុន សែន នាយករដ្ឋមន្ត្រីនៃរាជរដ្ឋាភិបាលកម្ពុជាបានសម្រេចផ្តល់អំណោយកសាងស្ពានបេតុង ព្រះពន្លា មានបណ្តោយ ១២០ម៉ែត្រ ទទឹង១០ម៉ែត្រ ឆ្លងស្ទឹងសិរីសោភ័ណ ម្តុំវត្តព្រះពន្លា នាភូមិ៤និងភូមិព្រៃឬស្សី សង្កាត់ព្រះពន្លា ក្រុងសិរីសោភ័ណ ។
នាយឧត្តមសេនីយ៍ ខេង សុមេធ អគ្គស្នងការរងនគរបាលជាតិ -ប្រធានកងវិស្វកម្មសម្តេចតេជោខេត្តសៀមរាប ថ្លែងឱ្យដឹងកាលពីល្ងាចថ្ងៃទី០៣ ខែកក្កដា ឆ្នាំ២០២២ ខណៈអញ្ជើញចុះពិនិត្យទីតាំងគម្រោងសាងសង់ស្ពាន ។
ក្នុងឱកាសនោះក៏មានវត្តមាន ឯកឧត្តម ខេង ស៊ុម ប្រធានក្រុមប្រឹក្សាខេត្ត ឯកឧត្តម អ៊ុំ រាត្រី អភិបាលខេត្តបន្ទាយមានជ័យ លោក ឡុង វុធ អនុប្រធានមន្ទីររៀបចំដែនៃដីនគរោបនីយកម្ម សំណង់និងសុរិយោដីខេត្ត លោក ហ៊ឹល រ៉ាយ៉ា អភិបាលក្រុងសិរីសោភ័ណ លោក នាង ហាវ អភិបាលរង និងពលរដ្ឋទទួលផលផងដែរ។
បើតាមនាយឧត្តមសេនីយ៍ ខេង សុមេធ ឱ្យដឹងថា ឯកឧត្តម កែ គឹមយ៉ាន ឧបនាយករដ្ឋមន្ត្រី ប្រធានក្រុមការងាររាជរដ្ឋាភិបាលចុះជួយខេត្តបន្ទាយមានជ័យទើបបានស្នើទៅសម្តេចតេជោ ហើយសម្តេចក៏ឆ្លើយតបថា ត្រូវចាប់ផ្តើមសាងសង់ស្ពានមួយជាបន្ទាន់ ។
សូមបញ្ជាក់ថា សំណង់ស្ពានបេតុងនេះ នឹងត្រូវសាងសង់ជំនួសស្ពានឈើចាស់ទ្រុឌទ្រោមដែលបានបាក់ដួលរលំខូចខាតដោយទឹកជំនន់កាលពីថ្ងៃទី១៣ខែតុលាឆ្នាំ២០២០កន្លងមក។ ការសាងសង់នេះ ជាឆ្លើយតបទាន់ចិត្ត បន្ទាប់ពីព្រះសង្ឃ អាចារ្យ គណកម្មការ ពុទ្ធបរិស័ទ ពលរដ្ឋនៅសង្កាត់ព្រះពន្លានិងក្រុងសិរីសោភ័ណបានសំណូមពរកាលពីអំឡុងយុទ្ធនាការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៥ ដែលបានបោះឆ្នោតកាលពីថ្ងៃទី០៥ ខែមិថុនា ឆ្នាំ២០២២ ថ្មីៗ៕
ដោយ៖ Puthinews
Telegram Channel: Puthinews
Youtube Channel: Puthi News
Puthinews Android app: Puthi News
