ខេត្តស្ទឹងត្រែង៖ យុវជន ដែលទើបប្រឡងជាប់ជាកម្លាំងកងរាជអាវុធហត្ថថ្មីចំនួន២០នាក់ឱ្យ ដើម្បីទៅហ្វឹកហ្វឺន បង្កើនសមត្ថភាពសម្រាប់បំពេញការងារបម្រើប្រទេសជាតិមាតុភូមិ និងបានដាក់បញ្ចូលក្នុងក្របខ័ណ្ឌកងយោធពលខេមរភូមិន្ទក្នុងឆ្នាំ២០២៣នេះ។
ស្ទឹងត្រែង៖ នៅព្រឹកថ្ងៃទី១៩ មេសា ឆ្នាំ២០២៣ ឯកឧត្តម ស្វាយ សំអ៊ាង អភិបាលខេត្តមានក្នុងពិធីសំណេះសំណាល និងជូនដំណើរយោធិននៃកងរាជអាវុធហត្ថទើបជ្រើសរើសថ្មី ទៅមជ្ឈមណ្ឌលហ្វឹកហ្វឺនកងរាជអាវុធហត្ថ ភ្នំជំសែនរីករាយ ខេត្តកំពង់ឆ្នាំង នៅទីបញ្ជាការកងរាជអាវុធហត្ថខេត្តស្ទឹងត្រែង។ ក្នុងពិធីនេះដែរឯកឧត្តមមានប្រសាសន៍ថា៖ នេះជាធនធានមនុស្សមានកំរិតវប្បធ៌មខ្ពង់ខ្ពស់ និងប្រកបដោយចំណេះដឹង ដែលទទួលបានសេចក្តីទុកចិត្តពីថ្នាក់ដឹកនាំក្នុងជួរកងកម្លាំងប្រដាប់អាវុធ បានប្រលងជាប់ជាស្ថាពរ ហើយទទួលបានការលើកទឹកចិត្តឱ្យទៅហ្វឹកហ្វឺន ដើម្បីមានសមត្ថភាពបន្ថែម សម្រាប់បំពេញការងារបំរើសង្គមជាតិយើង។
ឯកឧត្តមមានប្រសាសន៍បន្តថា៖ជាមួយនិងការទៅហ្វឹកហ្វឺននេះក្មួយៗត្រូវខិតខំបំពេញកាតព្វរបស់ខ្លួន មិនត្រូវព្រួយបារម្ភ ឬក្លាចមានការប្រឈម លំបាកដូចកាលពីសម័យសង្គ្រាមដែលយើងទៅនិងសមរភូមិមុខនោះទេ យើងនៅក្នុងស្រុកក្នុងទេសរបស់យើង ដែលជាប្រទេសយើងដែលមាន ពោរពេញទៅដោយសុខសន្តិភាព ក្រោមការដឹកនាំរបស់ សម្ដេចតេជោនាយករដ្ឋមន្ត្រី អញ្ចឹងវាមិនមានបញ្ហាអ្វីធ្វើឱ្យប៉ះពាល់ទៅដល់ កម្លាំងរបស់យើង ឬក៏ហានីភ័យ ប៉ុន្តែគ្រាន់តែថា នេះអាស្រ័យទៅដោយ ភាពប្រាកដប្រជាម៉ឺងម៉ាត់របស់យើង ហើយការប្រាកដប្រជាដែលនាំឱ្យខ្លួនយើង ឈានទៅរកភាពជោគជ័យ។ លោកឧត្តមសេនីយ៍ត្រី អៀង វ៉ាន់ឌី មេបញ្ជាការកងរាជអាវុធហត្ថខេត្តស្ទឹងត្រែងបានបញ្ជាក់ថា៖
នេះជាគោលការណ៍ដឹកនាំដ៍ខ្ពង់ខ្ពស់ ពីឯកឧត្តមនាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ដើម្បីឱ្យកម្លាំងថ្មីទើបប្រឡងជាប់បានក្លាយទៅជាកងកម្លាំងមានសមត្ថភាពគ្រប់គ្រាន់ បានចូលរួមចំណែកក្នុងការការពារជាតិ សាសនា ព្រះមហាក្សត្រ។
យុវជន គា កវី តំណាងឱ្យកម្លាំងថ្មីទើបប្រឡងជាប់មានទីលំនៅឃុំក្បាលរមាស ស្រុកសេសាន បានប្តេជ្ញាខិតខំហ្វឹកហ្វឺន រៀនសូត្រ បំពេញតួនាទីភារកិច្ច បទវិន័យទូទៅ សម្រាប់កងយោធពលខេមរភូមិន្ទ បទបញ្ជា និងការចាត់តាំងរបស់អង្គភាព ឱ្យបានឆ្លើយតបតាមការផ្តាំផ្ញើ ពីឯកឧត្តអភិបាលខេត្ត និងមេបញ្ជាការកងរាជអាវុធខេត្តស្ទឹងត្រែង។
សូមបញ្ចាក់ថា៖ កម្លាំងថ្មីនេះពិតជាបានជ្រើសរើសទៅតាមលក្ខខណ្ឌ និងមានលក្ខណៈសម្បត្តិត្រឹមត្រូវ តាមការចង់បានរបស់អគ្គមេបញ្ជាការកងរាជអាវុធហត្ថលើផ្ទៃប្រទេស ដើម្បីពង្រឹងធនធានកងកម្លាំងឱ្យមានប្រសិទ្ធភាព ក្នុងការបំពេញការងារបម្រើប្រទេសជាតិមាតុភូមិនៃយើង។
ហើយជាមួយ និងការជូនដំណើរទៅហ្វឹកហ្វឺននេះ ឯកឧត្តម ស្វាយ សំអ៊ាង អភិបាលខេត្តបានជួយឧបត្ថម្ភនូវថវិកាម្នាក់ៗ ២៥ម៉ឺនរៀល សាលាក្រុងស្ទឹងត្រែងម្នាក់ម្នាក់ៗ៥ម៉ឺនរៀលផងដែរ៕
ដោយ៖ Puthinews
Youtube Channel: Puthi News
Telegram Channel: Puthi News
Puthinews Android app: Puthi News
