30 C
Phnom Penh
Saturday, October 1, 2022

ម៉ិកស៊ិកចាប់បានស្តេចត្រាញ់គ្រឿងញៀនដ៏ល្បីឈ្មោះមួយរូប

(អន្តរជាតិ)៖ ស្តេចគ្រឿងញៀនដ៏ល្បីមួយរូបដែលស្ថិតនៅក្នុងបញ្ជីតាមចាប់ខ្លួនរបស់ FBI ត្រូវបានចាប់ខ្លួនដោយកងទ័ពជើងទឹកម៉ិកស៊ិក។ នេះបើយោងតាមការចុះផ្សាយរបស់សារព័ត៌មានCNN នៅថ្ងៃទី១៦ ខែកក្កដា ឆ្នាំ២០២២។

លោក Rafael Caro Quintero អាយុ៦៩ឆ្នាំដែលត្រូវបានគេស្គាល់ថាជាស្តេចនៃអ្នកជួញដូរគ្រឿងញៀនត្រូវបានអាជ្ញាធរម៉ិកស៊ិកចាត់ទុកថាជាស្ថាបនិកនៃក្រុមជួញដូរ Guadalajara ដែលសកម្មបំផុតក្នុងទសវត្សរ៍ឆ្នាំ១៩៧០ និង១៩៨០។ ក្រុមនេះជួញដូរជាចម្បងនូវកូកាអ៊ីន ហេរ៉ូអ៊ីន និងកញ្ឆាពីម៉ិកស៊ិកទៅអាមេរិក។

លោកត្រូវបានទាហានម៉ារីនចាប់ឃុំខ្លួន បន្ទាប់ពីត្រូវបានគេប្រទះឃើញលាក់ខ្លួននៅក្នុងគុម្ពោតព្រៃនៅក្នុងទីក្រុង San Simón ទីក្រុង Choix ក្នុងរដ្ឋ Sinaloa ភាគពាយ័ព្យ នេះបើយោងតាមសេចក្តីថ្លែងការណ៍របស់កងទ័ពជើងទឹកម៉ិកស៊ិក។

លោក Caro Quintero ធ្លាប់ត្រូវបានកាត់ទោសឱ្យជាប់គុក៤០ឆ្នាំ សម្រាប់ការចាប់ពង្រត់ ការធ្វើទារុណកម្ម និងឃាតកម្មលើភ្នាក់ងាររដ្ឋបាលគ្រឿងញៀនរបស់សហរដ្ឋអាមេរិក ក្នុងឆ្នាំ១៩៨៥។ ហើយរឿងរ៉ាវ​ទាំង​នោះ​ត្រូវ​បាន​គេ​ថត​ជា​​រឿង​ភាគ Netflix “Narcos: Mexico”។

ក្នុងឆ្នាំ២០១៣  Caro Quintero បានចំណាយពេល ២៨ឆ្នាំ នៅក្នុងគុកនៅក្នុងប្រទេសម៉ិកស៊ិក តុលាការឧទ្ធរណ៍ម៉ិកស៊ិកបានដោះលែង Caro Quintero ដែលធ្វើឱ្យអាជ្ញាធរអាមេរិក និងរដ្ឋអាជ្ញាម៉ិកស៊ិកខឹងសម្បារជាខ្លាំង។

យោងតាម ​​FBI បានឱ្យដឹងថា Caro Quintero បានវិលត្រឡប់ទៅជួញដូរគ្រឿងញៀនវិញក្នុងនាមជាមេដឹកនាំជាន់ខ្ពស់នៃក្រុមជួញដូរគ្រឿងញៀន Sinaloa។

ក្នុងប្រតិបត្តិការដែលបានបញ្ចប់ដោយសោកនាដកម្ម ដោយទាហានម៉ារីន១៤នាក់ ដែលបានជួយក្នុងការចាប់ខ្លួនត្រូវបានស្លាប់នៅក្នុងការធ្លាក់ឧទ្ធម្ភាគចក្រ។

យោងតាមសេចក្តីថ្លែងការណ៍បានឱ្យដឹងថា ឧទ្ធម្ភាគចក្រ Black Hawk របស់កងទ័ពជើងទឹកម៉ិកស៊ិកបានធ្លាក់នៅ Los Mochis រដ្ឋ Sinaloa បន្ទាប់ពីប្រតិបត្តិការបានបញ្ចប់។ ទាហាន​ម៉ារីន​ម្នាក់​ទៀត​រង​របួស​កំពុង​សម្រាក​ព្យាបាល​នៅ​មន្ទីរ​ពេទ្យ។

សេចក្តី​ថ្លែងការណ៍​បាន​បន្ថែម​ថា មូល​ហេតុ​នៃ​ការ​ធ្លាក់​យន្តហោះ​នេះ​មិន​ត្រូវ​បាន​គេ​ដឹង​ឡើយ ហើយ​ការ​ស៊ើប​អង្កេត​នឹង​កើត​ឡើង៕

ដោយ៖ Puthinews

Telegram Channel: Puthinews

Youtube Channel: Puthi News

Puthinews Android app: Puthi News

- Advertisement -spot_imgspot_img
- Advertisement -spot_imgspot_img

អានបន្ត