27 C
Phnom Penh
Friday, September 30, 2022

ថៃបង្ក្រាប​អ្នក​ជ្រើសរើស​បុគ្គលិកឱ្យក្រុម​ឆបោក​តាម​ទូរស័ព្ទ

ប៉ូលីសបានចាប់ខ្លួន អាណាឆៃ មីផូ (Anachai Meepho) អាយុ ៣០ឆ្នាំ ជាអ្នកឆបោកតាមទូរស័ព្ទនៅខេត្តស្រះកែវកាលពីថ្ងៃព្រហស្បតិ៍។ ការ​ស៊ើបអង្កេត​បន្ថែម​បាន​ឈាន​ដល់​ការ​ចាប់​ខ្លួន​សមាជិក​ក្រុមឆបោក​ពីរ​នាក់​ទៀត​នៅ​ថ្ងៃ​សុក្រ។

មនុស្សពីរនាក់ទៀត ដែលជាប់ចោទពីបទជ្រើសរើសជនជាតិថៃគ្មានការងារធ្វើ ឱ្យមកធ្វើការឱ្យក្រុមឆបោកតាមទូរស័ព្ទនៅកម្ពុជា ត្រូវបាននគរបាលចាប់ខ្លួននៅខេត្តស្រះកែវ និងទីក្រុងបាងកក។

ម្នាក់​ត្រូវ​បាន​គេ​ចោទ​ប្រកាន់​ថា​បាន​ផ្តល់​កន្លែង​ស្នាក់​នៅ​ផ្ទះ​របស់​នាង​ក្នុង​ខេត្ត​ស្រះកែវ​សម្រាប់​អ្នក​ជ្រើសរើស​បុគ្គលិក មុន​ពេល​ពួក​គេ​ត្រូវ​បាន​គេ​រត់ពន្ធ​ឆ្លង​ព្រំដែន​មក​កម្ពុជា។

ការចាប់ខ្លួននៅក្រុងបាងកកក៏ឈានទៅដល់ការចាប់ខ្លួនមនុស្សបួននាក់ផ្សេងទៀត ពីបទបើកគេហទំព័រល្បែងស៊ីសងចេញពីផ្ទះខាងលើ។

នាយឧត្តមសេនីយ៍ ដាំរ៉ុងសាក់ គិទិប្រាផា (Damrongsak Kittiprapas) ប្រធានក្រុមការងារនគរបាលប្រឆាំងបទល្មើសតាមអ៊ីនធឺណេត (Police Cyber ​​Task Force) បាននិយាយថា មន្រ្តីរបស់លោក និង ក្រុមការងារពិសេស Burapha 491 បានចាប់ខ្លួនជនសង្ស័យសំខាន់ៗចំនួន ២នាក់ កាលពីព្រឹកថ្ងៃសុក្រ បន្ទាប់ពីមានការចាប់ខ្លួនសមាជិកក្រុមឆបោកម្នាក់ទៀតកាលពីថ្ងៃព្រហស្បតិ៍។

រុង រឿឌី ឧត្តមឌី (Rungruedee Udomdee) អាយុ ៣៨ឆ្នាំ និង ផុងថាណា ភីមផា (Phongthana Phimpha) អាយុ៣៦ ឆ្នាំ ត្រូវ​បាន​តុលាការ​ខេត្តសាមុតប្រាកាន ចេញដីកាចាប់ខ្លួន​នៅ​ថ្ងៃ​ទី២៧ ខែ​កក្កដា ពី​បទ​ឃុបឃិត​ក្នុង​ការ​ក្លែង​បន្លំ​សាធារណៈ ការ​ប្រមូល​ផ្តុំ​ដោយ​ខុស​ច្បាប់ ឧក្រិដ្ឋកម្ម​ឆ្លង​ប្រទេស ការ​លាង​លុយ​កខ្វក់ និង​បទល្មើស​ពាក់ព័ន្ធផ្សេងទៀត។

កញ្ញា រុង រឿឌី ត្រូវ​បាន​ចាប់​ខ្លួន​នៅ​ពេល​ដែល​នគរបាល​បាន​បញ្ឈប់​រថយន្ត​ភីកអាប់​របស់​នាង​នៅ​លើ​ផ្លូវ​វាង​ក្នុង​ឃុំ បានម៉ៃ ណងសៃ (Ban Mai Nongsai) ស្រុកអារ៉ាញ់ប្រាថេត ខេត្ត​ស្រះកែវ កាល​ពី​ព្រឹក​ថ្ងៃ​សុក្រ។ ក្នុង​ការ​ឆែកឆេរ​ផ្ទះ​របស់​នាង​ជា​បន្តបន្ទាប់​នៅ​ស្រុក​ខក់​ស៊ុ​ង នៃ​ខេត្ត​ជាប់​ព្រំដែន ពួក​គេ​បាន​ដកហូត​ទូរស័ព្ទ​ដៃ​២​គ្រឿង និង​សៀវភៅ​គណនី​ធនាគារ​ចំនួន​៧ ជាវត្ថុតាង ។

អគ្គស្នងការរងនគរបាលជាតិ នាយឧត្តមសេនីយ៍ ដាំរ៉ុងសាក់ មានប្រសាសន៍ថា ផ្ទះនេះត្រូវបានប្រើប្រាស់ជាកន្លែងសម្រាប់ស្វែងរកការងារ ដែលនាងត្រូវបានចោទប្រកាន់ថាបានល្បួងឱ្យធ្វើការជាអ្នកឆបោកតាមទូរស័ព្ទ មុនពេលពួកគេត្រូវបានគេនាំឆ្លងដែនខុសច្បាប់មកប្រទេសកម្ពុជា។

ក្នុង​ពេល​សាកសួរ កញ្ញា រុង រឿឌី បាន​សារភាព​ចំពោះ​ការ​ចោទ​ប្រកាន់ ហើយ​បាន​និយាយ​ថា បុរស​ខ្មែរ​ម្នាក់​បាន​បង់​ប្រាក់​ឲ្យ​នាង ១.០០០ បាត​ក្នុង​មួយនាក់ ដើម្បី​បញ្ជូន​អ្នកដែលបាន​ជ្រើសរើស​មក​កម្ពុជា។

ការឆែកឆេរលើមនុស្សដែលមានទំនាក់ទំនងជាមួយនាងបានបង្ហាញថា មិត្តប្រុសរបស់នាងឈ្មោះ ប៉ូយ៉ាង ស៊ីនសាថា (Boonyang Silsattha) និងបងប្រុសរបស់គាត់ឈ្មោះ សាក់ឆៃ ស៊ីនសាថា (Sakchai Silsattha) ត្រូវបានចាប់ខ្លួននៅស្រុក កក់ ស៊ុង ខេត្តស្រះកែវកាលពីខែឧសភា ពីបទប្រព្រឹត្តបទល្មើសដូចគ្នា។ នាង​បាន​សារភាព​ថា​នាង​បាន​ចូលធ្វើ​ការងារនេះ ​បន្ទាប់មកពួកគេត្រូវបាន​ចាប់ខ្លួន​។

នាយឧត្តមសេនីយ៍ ដាំរ៉ុងសាក់ បាននិយាយថា នៅទីក្រុងបាងកក នគរបាលបានចាប់ខ្លួនលោក ផុងថាណា នៅផ្ទះមួយក្នុងសង្កាត់ សួន លួង កាលពីព្រឹកថ្ងៃសុក្រ។

លោក ផុង ថាណា បានបដិសេធថាមិនមែនជាសហការីជិតស្និទ្ធរបស់ អាណាឆៃ មីផូ អាយុ៣០ ឆ្នាំនោះទេ ប៉ុន្តែបានសារភាពថា បុរសនោះបានបង់ប្រាក់ឱ្យគាត់ចំនួន ១,០០០ បាតក្នុងម្នាក់ ដើម្បីជួយមនុស្សឆ្លងដែនខុសច្បាប់មកកម្ពុជា។ គាត់​បាន​និយាយ​ថា​គាត់​មិន​បាន​ដឹង​ថា​ពួកគេ​ត្រូវ​បាន​គេ​បញ្ជូន​ទៅ​ធ្វើ​ការ​ជា​អ្នក​ឆបោក​តាម​ទូរស័ព្ទនោះទេ​។

លោក អាណាឆៃ ត្រូវ​បាន​ចាប់​ខ្លួន​នៅ​ខេត្ត​ស្រះកែវ​កាល​ពី​ថ្ងៃ​ព្រហស្បតិ៍​ ហើយក៏ត្រូវជាប់ចោទ​ពី​បទ​បញ្ជូន​មនុស្ស​ទៅ​ធ្វើ​ការ​ជា​អ្នក​ឆបោក​តាម​ទូរស័ព្ទ​នៅ​កម្ពុជា។ ការ​ចាប់​ខ្លួន​នេះ​នាំ​ឱ្យ​មាន​ការ​ចាប់​ខ្លួន​កញ្ញា រុងរឿឌី និង​លោក ផុង ថាណា។

អ្នកដែលត្រូវបានចាប់ខ្លួន​ទាំង​២​នាក់ ថ្មីៗនេះ ​ត្រូវ​បាន​ប្រគល់​ឱ្យ​នគរបាល​ខេត្ត​សា​មុត​ប្រា​កាន ដើម្បី​ចាត់ការ​តាម​ច្បាប់ ។

ផ្ទះ​ដែល​លោក ផុង ថាណា ត្រូវ​បាន​ចាប់​ខ្លួន​ត្រូវ​បាន​រក​ឃើញថា ​ក៏​ត្រូវ​បាន​គេ​ប្រើ​ជា​ការិយាល័យ​សម្រាប់​គេហទំព័រ​ល្បែង​ស៊ីសង​ចំនួន ៥ ផង​ដែរ។ យុវជន៤នាក់ ប្រុស២នាក់ ស្រី២នាក់ ត្រូវបានឃាត់ខ្លួន ដោយដកហូតកុំព្យូទ័រ២គ្រឿង កុំព្យូទ័រ Notebook ១គ្រឿង ម៉ូនីទ័រកុំព្យូទ័រ៦គ្រឿង និងទូរសព្ទដៃ៤គ្រឿង ទុកធ្វើជាវត្ថុតាង៕
ដោយ៖ ពុទ្ធិញ៉ូស៍

Telegram Channel: Puthi News

Youtube Channel: Puthi News

Puthinews Android app: Puthi News

- Advertisement -spot_imgspot_img
- Advertisement -spot_imgspot_img

អានបន្ត