ស្តាប់អត្ថបទជាសម្លេង
ក្រុមជួយសង្គ្រោះកំពុងប្រញាប់ប្រញាល់ក្នុងការស្វែងរកអ្នកនៅមានជីវិតពីការរញ្ជួយដីដ៏អាក្រក់បំផុត ដែលបានវាយប្រហារប្រទេសហៃទីកាលពីថ្ងៃសៅរ៍ ស្របពេលដែលព្យុះត្រូពិកមួយបានវាយប្រហារប្រទេសនៅក្នុងតំបន់សមុទ្រការ៉ាអ៊ីបមួយនេះថែមទៀត។
មនុស្សយ៉ាងហោចណាស់ចំនួន ១.៤១៩នាក់បានបាត់បង់ជីវិតនៅក្នុងគ្រោះរញ្ជួយដីកម្រិត ៧,២រ៉ិចទ័រនោះ ចំណែកមនុស្សជាង ៦.៩០០នាក់ទៀតបានរងរបួស និងជាច្រើននាក់កំពុងបាត់ខ្លួននៅឡើយ។
ព្យុះត្រូពិក ហ្គ្រេស (Grace) ត្រូវបានព្យាករថានឹងបណ្ដាលឲ្យមានភ្លៀងធ្លាក់ខ្លាំងក្នុងកម្រិតរហូទៅដល់២៥សង់ទីម៉ែត្រ នៅលើតំបន់ដែលរងផលប៉ះពាល់ខ្លាំងបំផុតពីការរញ្ជួយដី។ មានការបារម្ភថាទឹកជំនន់អាចបង្កឲ្យមានការរអិលបាក់ដីថែមទៀតផង។
ផ្លូវថ្នល់ដែលមិនអាចធ្វើចរាចរណ៍បានរួចស្រេចទៅហើយដោយការរញ្ជួយដីនោះ អាចនឹងត្រូវបានខូចខាតថែមទៀតដោយសារភ្លៀងធ្លាក់ខ្លាំង ដូច្នេះហើយក្រុមផ្ដល់ជំនួយកំពុងរូតរះនាំយកសម្ភារចាំបាច់ផ្សេងៗទៅឲ្យតំបន់ដែលរងគ្រោះពីការរញ្ជួយដី។
ក្រុមរុករក និងក្រុមជួយសង្គ្រោះមកពីអាមេរិក និងស៊ីលីបានទៅដល់ប្រទេសហៃទី ខណៈដែលក្រុមមកពីប្រទេសម៉ិកស៊ិកកំពុងនៅតាមផ្លូវ។ ជាមួយគ្នានេះ ក្រុមគ្រូពេទ្យរបស់ប្រទេសគុយបាបានទៅដល់ប្រទេសហៃទីហើយ និងកំពុងជួយពលរដ្ឋ។
អង្គការផ្ដល់ជំនួយមនុស្សធម៌នានាបានប្រកាសថា អ្នកនៅមានជីវិតពីការរញ្ជួយដីនេះត្រូវការទឹកស្អាត និងទីជម្រក។ គ្រួសារជាង ៣ម៉ឺនត្រូវបានគេរាយការណ៍ថាបានបាត់បង់ផ្ទះសម្បែង។
គួរកត់សម្គាល់ថា ការរញ្ជួយដីនេះបានបង្កជាបញ្ហាថែមទៀតដល់ប្រទេសក្រីក្រហៃទីដែលកំពុងរងគ្រោះស្រាប់ទៅហើយពីវិបត្តិនយោបាយ បន្ទាប់ពីមានការធ្វើឃាតប្រធានាធិបតីរបស់ខ្លួនកាលពីខែមុន៕
អត្ថបទនឹងរូបភាព ដោយ Puthi news
