30 C
Phnom Penh
Saturday, October 1, 2022

ក្រសួងទេសចរណ៍ផ្ដល់កាបណ្ដុះបណ្ដាលបដិសណ្ឋារកិច្ចដល់យុវជន៨៨៤រូបតាមរយៈគម្រោងហូកា ក្នុងឆមាសទី១ ឆ្នាំ២០២២

(ព្រះវិហារ)៖ គិតត្រឹមឆមាសទី១ ឆ្នាំ២០២២ គណៈកម្មការគ្រប់គ្រងគម្រោង ហូកា នៃក្រសួងទេសចរណ៍ បានបណ្តុះបណ្តាលអ្នកជំនាញ និងគ្រូបង្គោលសរុបចំនួន ៨៨៤រូប (ស្រី ៥៩៦រូប) ក្រោមការគាំទ្ររបស់អង្គការ SwissContact អង្គការអន្តរជាតិខាងការងារ (ILO) និងអង្គការ UNIDO លើជំនាញសេវាកម្មម្ហូបអាហារ និងភេសជ្ជៈ ការិយាល័យជួរមុខ គេហកិច្ច ចុងភៅ ជំនាញឆុងកាហ្វេ។

ស្ថិតិនេះត្រូវបានលើកឡើងក្នុងកិច្ចប្រជុំបូកសរុបលទ្ធផលការងារឆមាសទីទី១ និងទិសដៅឆមាសទី២ ឆ្នាំ២០២២ របស់គណៈកម្មការគ្រប់គ្រងគម្រោង ហូកា ដោយផ្ទាល់នៅសណ្ឋាគារលីហួត ខេត្តព្រះវិហារ នាថ្ងៃទី១៩ ខែមិថុនា ឆ្នាំ២០២២ ក្រោមអធិបតីភាពលោក ប៉ាក់ សុខុម រដ្ឋលេខាធិការក្រសួងទេសចរណ៍ និងជាប្រធានគណៈកម្មការគ្រប់គ្រងគម្រោង ហូកា ដោយមានការចូលរួមពីសំណាក់លោក Christain Volker Ide ប្រធានកម្មវិធីអភិវឌ្ឍន៍ជំនាញ (SDP) លោក លោកស្រីសមាជិកគណៈកម្មការ គ.គ.ហ. តំណាងសមាគមឧស្សាហកម្មទេសចរណ៍ មន្ទីរទេសចរណ៍ខេត្តភូមិភាគឦសាន្ត និងខេត្តជុំវិញបឹងទន្លេសាបសរុបចំនួន៣០រូប។

លោករដ្ឋលេខាធិការបានលើកឡើងថា កិច្ចប្រជុំបូកសរុបលទ្ធផលការងារប្រចាំឆមាសទី១ និងទិសដៅអនុវត្តបន្តឆមាសទី២ ឆ្នាំ២០២២ របស់គណៈកម្មការគ្រប់គ្រងគម្រោង ហូកា នឹងបង្ហាញពីកិច្ចខិតខំប្រឹងប្រែង និងសមិទ្ធផលការងារសំខាន់ៗរបស់លេខាធិការដ្ឋាន និងមន្ទីរទេសចរណ៍ខេត្តបានអនុវត្តកន្លងមក នៅតាមខេត្តគោលដៅគម្រោងរួមមានខេត្តក្រចេះ ស្ទឹងត្រែង ព្រះវិហារ រតនគិរី និងមណ្ឌលគិរី សៀមរាប បាត់ដំបង ពោធិ៍សាត់ និងកំពង់ឆ្នាំង ព្រមទាំងបញ្ហាប្រឈមនានាក្នុងការបណ្តុះបណ្តាលបដិសណ្ឋារកិច្ច ហូកា ព្រមទាំងដាក់ទិសដៅការងារបន្តរបស់មន្ទីរទេសចរណ៍នៃខេត្តគោលដៅគម្រោងសម្រាប់អនុវត្តការងារនៅឆមាសទី២ ឆ្នាំ២០២២ខាងមុខនេះ និងជាវេទិការដើម្បីផ្លាស់ប្តូរ និងចែករំលែកបទពិសោធន៍ការបណ្តុះបណ្តាលបដិសណ្ឋារកិច្ចដល់សមាគមឧស្សាហកម្មទេសចរណ៍ និងវិស័យឯកជន ដើម្បីពិនិត្យលទ្ធភាពចាប់យកកម្មវិធីបណ្តុះបណ្តាលបដិសណ្ឋារកិច្ច ហូកា ទៅក្នុងផែនការរបស់ខ្លួន។

លោកបានបញ្ជាក់ថា តាមរយៈយន្តការគណៈកម្មការគ្រប់គ្រងគម្រោង ហូកា ដែលជាយន្តការស្នូលនៃកិច្ចសហប្រតិបត្តិការ និងការពង្រឹងយន្តការការងារទាំងថ្នាក់ជាតិ និងក្រោមជាតិក្នុងការអនុវត្តគម្រោងបណ្តុះបណ្តាលបដិសណ្ឋារកិច្ច ហូកា យើងនឹងសម្រេចបានលទ្ធផលល្អប្រសើរបន្ថែមទៀត ដែលចូលរួមចំណែកដល់វិស័យទេសចរណ៍កម្ពុជា និងការពង្រឹងជំនាញវិជ្ជាជីវៈទេសចរណ៍ ដូចដែរ លោក ថោង ខុង រដ្ឋមន្ត្រីក្រសួងទេសចរណ៍ តែងលើកឡើងថា ជំនាញវិជ្ជាជីវៈទេសចរណ៍ ជាអាយុជីវិតរបស់អ្នក (Tourism Skills Is your Life)។

លោក ជួប រតនា ប្រធាននាយកដ្ឋានផែនការអភិវឌ្ឍន៍ទេសចរណ៍ និងជាប្រធានលេខាធិការដ្ឋាននៃគណៈកម្មការគ្រប់គ្រងគម្រោង ហូកា បានរាយការណ៍ពីលទ្ធផលនៃការបណ្តុះបណ្តាលបដិសណ្ឋារកិច្ច ហូកា ប្រចាំឆមាសទី១ ឆ្នាំ២០២២ ដោយក្នុងនោះគណៈកម្មការគ្រប់គ្រងគម្រោង ហូកា បានធ្វើការបណ្តុះបណ្តាលអ្នកជំនាញ និងគ្រូបង្គោលសរុបចំនួន៨៨៤រូប (ស្រី ៥៩៦រូប) ក្រោមការគាំទ្ររបស់អង្គការ SwissContact អង្គការអន្តរជាតិខាងការងារ (ILO) និងអង្គការ UNIDO លើជំនាញសេវាកម្មម្ហូបអាហារ និងភេសជ្ជៈ ការិយាល័យជួរមុខ គេហកិច្ច ចុងភៅ ជំនាញឆុងកាហ្វេ នៅខេត្តព្រះវិហារ ក្រចេះ ស្ទឹងត្រែង រតនគិរី មណ្ឌលគិរី ខេត្តសៀមរាប បាត់ដំបង ពោធិ៍សាត់ និងកំពង់ឆ្នាំង។

លោក រតនា បានបន្តថា ការបណ្តុះបណ្តាលបដិសណ្ឋារកិច្ច ហូកា ផ្តោតលើចំណេះដឹង និងជំនាញដល់សិក្ខាកាមដែលជាអ្នកជំនាញកំពុងបម្រើការងារបច្ចុប្បន្ន យុវជនទីទាល់ក្រ និងអ្នកជំណាញដែលបានឈប់សម្រាកពីការងារដោយវិបត្តិជំងឺកូវី-១៩។

លោក Christain Volder Ide បានអបអរសារទរចំពោះលទ្ធផលដែលគណៈកម្មការគ្រប់គ្រងគម្រោង ហូកា និងមន្ទីរទេសចរណ៍ខេត្តគោលដៅគម្រោងដែលបានសហការ និងខិតខំអនុវត្តផែនការសកម្មភាពបានយ៉ាងល្អប្រសើរដែលសម្រេចបានលទ្ធផលគួរឲ្យមោទនៈ។

លោក Christain បានបញ្ជាក់ថា តាមរយៈកិច្ចសហការដ៏ល្អនេះ អង្គការ SwissContact នឹងពង្រីកការបណ្តុះបណ្តាលបដិសណ្ឋារកិច្ច ហូកា ទៅខេត្តបាត់ដំបង ប៉ៃលិន ពោធិ៍សាត់ បន្ទាយមានជ័យ និងឧត្តរមានជ័យ ដែលជាគោលដៅអាទិភាព និងមានសក្តានុពលវិស័យទេសចរណ៍៕


ដោយ៖ Puthinews

Telegram Channel: Puthinews

Youtube Channel: Puthi News

Puthinews Android app: Puthi News

- Advertisement -spot_imgspot_img
- Advertisement -spot_imgspot_img

អានបន្ត